والداخلية عيلة عريقة وعتيقة

والداخلية عيلة عريقة وعتيقة وأسرة في بعضيهم وبيتلموا على بعض ويكذبوا العالم ويصدقوا بعض بل والملازم يغلط فينا قدام لواءاته!

اي حد منهم يحاسب

قوم أصح فز

قوم أصح فز

اخشع على ركبك هنا

اخرس ونفذ

لا مش كابوس

ومنيش شيطان ده انت اللي من اخلص عبيده

أكتم كلام

اقطع نفس

وانزل على ركبك قصادي

لا بص فوق

أنا لما أخلص حأمرك

تبص تحت

وتبكي تحت

ولما تعجز عن كرامتك

ابق سورق

وحوشوشك:

مش قلتلك

أنا أهه يا مارد

طويل، سريع،

وصلت قبلك

مَش لأصلك أو ميراثك (حاشى لله)

ل مخدعك

وادي قبضتي تيجي نص كفك

وبخنقك

ومعاك طبنجة نسيت مكانها

ولو افتكرت

حتكون في جيبي

ولو جروءت على التظاهر بالثبات

حخليهالك عالمخدة

وحخلي دول تذكار في دي

قصرية الزرع الصناعي فوق رقبتك عاوزة نفضة

غير اللي صدا من ضميرك

وغير وغير

-------

اسمع لأمري

ركز في وشي

واحفظه

الوش ده مش اي وش

ده الجاي من كل اللي راح

سفاح؟ حلنجي؟ مرتزق؟

لا ما تحاولش

ما تشوفش منه الخير ولا تتلفظه

مالك؟ خلصت؟ اقطع نفس! خلص حرام؟ حرمت عليك! مالك يالا

مشلول؟ مبنج؟ لم شملك هُس هِس!

خد شم دمك لما ساح

فين الحرس؟ مبلول؟ مهنج؟ خد نفس

هس انكتم

إياك اشوفك تترعش

حنكك تسكه وضم بوزك فين لسانك؟

قلت ايه؟؟

كده نبتدي من سين سأفعل

جيم جابوك تشبه ابوك لكن كهين

جالك مصابك في اللي جابك مالسرير

دلوقتي من فينا الامير؟

من بكرة عد وخد ده وعد

حتشوفني تاني ودي الاخيرة في يوم اخير

انا مش كابوس

ومش ملاك الموت أنا

انا موت جنابك بس من عين الزمن

---------

في الساعة صفر في ليل غزير

شمال يمين ويمين شمال

بعد الشهور

قبل السنة

حتشوفني تاني وحسألك

عن شيء ناسيه أول ما قلته وأشهدك على جثتك

وأفرجك على ايه حيفصل راس عظمتك لا وتهتف غصب عنك زينا

من جوة قلبك وانت فار محتار بترجف

واديك شاكوش يخرق نفوخك وآؤمرك ثابت تصقف

للخلف در فورا تدر يمين شمال شمال يمين

تهمس آمين

انظر لنفسك واعترف

وتعال عالسلم معاك كفنك كأنك دميتك معمول بها حتة فانوس

ومشكلينها كوز حلاوة فيها سم

بايدي اشاور تطفحك

تاكلك وتخلص منه فيه

زي المرض جوة النيران

وفي لحظة حتشوفني وانا

راشق عدالتي في الميدان

تنزف مكانك باحترام

عال مقصلة

وهكذا.. وهكذا

هكذا.. وهكذا..

---------------

أدباتي لكن على قدي وبنادي الظهر

امّم تشوفني وتعدي ولا سمعت سطر

راضي بناسي ولو بلدي حيدوسها القطر..

حنط بينهم يفرمني.. واقلب انا القطر!

الصبر طيب وبلادي صعبة على الشرح

كثير من الكدب السادي مغموس في الجرح

وسم سم وبَقى عادي نغلط في الصح

والصح نفسه صبح هادي يسكت ويسح

! حاسب يا باشا لتتكعبل زي السابقين

شايفك حليوة ومستهبل والقلب كهين

القطر شارخ ومحمّل وانتو الفاهمين

ولا مية محطة تجيب حطة واصلين واصلين

حاسب يا باشا لتتشنكل، سلم مكسور

كحته الزمن كحت الأرجل كحت المقهور

الناس غلابة ما يتحمل شيلها المغرور

مجاريح ودمك لما يسيح حتحس النور

حاسب يا باشا الناس يحة وانت يدوب اف!

عزبة وقصر فلوس رايحة وراجعالك ضعف

والأرملة تسرق بلحة تتجاب بالولف

وكله ذُل والاستثنا لاصحاب الصرف

حاسب يا بشبش تتزحلق لاالعتبة جزاز

والنايلو يا ويله يزيق، والحيط هزاز

جثث!رمم ! وانت مروق، والشلة لذاذ

واللذة من بقكو بظة وعيونكو ازاز

من دول؟ لا ابدا دول شعبك عضم وامراض

وأقساط وحبس بعيد عنك ف جهاز وبياض

كسالى مين؟؟ يلعن اهلك تنبل عضاض!

دي بطالة ذنب البطّالة طبقتكم ياض!

اذن خلاص خلصت خالص او فالخلصان

طبقة طبقكم باد خالص فيري باد انسان

شفتلكو رؤية وانا الخالص انا مالي يا مان

اسيادنا قلت، واديك لايص وطهوركم آن

وهكذا عاشت بلدي اصحى يا بشبوش

قرون من اللزقة البلدي سلاطين بكروش

لا منا بيه ولا فيه جندي والغُزّ جيوش

تاريخ قفلني من جدي وجيله المغشوش

فتح الحنك عند المصري اخطر يا كبير

سكوتي سايح على صبري على جسم فقير

وجلابيتي دي من عمري والهم حصير

وخش قلب أخوك مصري حتلاقي كثير

عمل الجدع دا كيت كات كيت منذ الفراعين

ودخل كفاح نطاط الحيط عالمحتلين

سعي وجهاد ضحك وزغاريط وبنات حلوين

وعيال بتبني من الفتافيت مساخيط حافيين

بحثت أحسن مالباشا اجهل مخلوق

اخرس لالبك بالماشة وباليح تفوق

شهدتكم وعلى الباشا وعليا يا ذوق

والسامعين تما باشا ومناخيرنا لفوق

حاسب يا باشا يا بغاشة شيشك مسكوك

الضحكة جاية من الشاشة والمجرم ابوك

مش ابوك ابوك "يُنقر" باشا وأمك "مملوك"

آباءكو خونة وهباشة، وعثمنلي خازوك

ومن ميتين وثمنتاشر عام بالتحديد

لو عدوا غُزّ ف يوم كافر او ليل عربيد

كان شعب مصر بيتاخر ويفز عبيد

للمصري ذُل ملوش اخر والغازي دا سيد

مسلم مسيحي بيتقطع في الغيط والحي

سفر، فرح، سوق الأربع.. لزما فيه أي

ده مصري صدغه بيترقع، ودي صرخة كي

مماليك وترك شعوب صيع والجيل كان ني

صعيد رشيد جيزة ومنيا.. مفيناش ولا بيه

وكلنا راكبين ثانية.. وقليل أبونيه

(مش اي تاجر يا بو سامية يتقال له أبيه

الحزمة دي تطلع مية و تطلع للبيه)

يقدموا فروض الطاعة ويوطي الطوع

يهدي البضاعة بوضاعة عامل مبلوع

وهو اصلا بلاعة والخلق بتوع

لياليه خباثة في خلاعة ودكانه خشوع

بحثا بحثت وأبحاثي بلدي وأفخر

منحاز مع الحق لناسي وماشي بسطر

غمضت شفت بإحساسي شافني الأخطر

فاطمي واموي وعباسي وانا بتمسمر!

فرعوني كلمة ولا السبة؟ جوا بلدها؟!

تلاكيك لتكفير الشابة ست بلادها

قال ايه ده كان فرعون حبة وموسى نجدها

وحبة حبة الجوز راحوا وجه اللي أخدها!

(موسى النبي مش من بابي ذكره بكلام

غير مثلما قالي كتابي: وعليه سلام

وإسرائيل مش محرابي.. أمة اجرام

سرقوا الدهب من أعتابي وبنوا عجل حرام!)

(اما اللي كان فرعون يومها.. شرير الوقت

لا مؤاخذة مات غرقان يومها مش مات دلوقت!

وجيوشه غرقت بهدومها وف أسرع وقت

ودي قصة ليه بنقومها و ف أخطر وقت؟!)

وهكذا ثار المصري لكن ناسي

ميتين سنة عاوز قصري يبقى لناسي

وقبلهم ميتينات ميتينات برمي أساسي

وينهبوني بكهنوتي وبحراسي!

وهكذا الثورة الشاملة غصب عن الكون

مادام بكش ولا النملة وحاسس بجنون

مش كان ف ايدي أجزّلكم رقبة شمشون؟

اكمني طيب بتعيب؟؟ دوقوا المسنون

وجريت لغيط مش متجرف وبكيت ف براح

حاستفتي قلبي ولو قافل.. هو الفتاح

حيحطلي في ضلمة غضبي بوصلة ومفتاح

وان كنت عالحق حطلع من ضعفي سلاح

أدباتي لكن على قدي وبنادي الظهر

امّم تشوفني وتعدي ولا سمعت سطر

راضي بناسي ولو بلدي حيدوسها القطر

حنط بينهم يفرمني.. واقلب انا القطر