Thursday, September 27, 2012

بحب العود



بحب العود
بحسه جاي من الماضي
بيشكي بس برجولة
ويقسى.. بس زي الأم
جراح الشرق في صياحه
أصيل في دنيا مجهولة
مايرغيشي ف كلام فاضي
ولا ينساشي ثار الدم


بحب العود
واجيب صوته ولو كان وسط ألف كمان
ومية طبلة وساكس كمان
بيخطفني لدنيا تانية ماعرفهاش
أشوف معبد ف حضن النيل
واشوف فراعين
واشوف كهنة على شعرا على سلاطين
وفسقية دمشقية حواليها ميتين جارية
وحرب ضروس ما بين فارس وأرض الكرد
وخيل بغدادي معتمدة ف شارع نار
وحرب بسوس
وشاب حليوة أندلسي بيتحرش بعرض البحر
وناس سمرا مراكبية
وناس بيضا وتركية
تشيلني بلاد توديني بلاد تانية
وانا مذهول ومش موجود
وماصحهاش الا لو يسكت رنين العود

بحب العود
عشان كاتم ف قلبه كلام
وبيلمح ومش بيقول
بيلمس جرحي وبيهرب
ويتسربلي في الأحلام
بحسه زي ذنب قديم.. عملته ولسه بتعذب
لكني ناسيه
بحسه.. هو ده حسي.. وانا بخفيه
بحب العود
عشان لو ضعت في الضوضاء وفي الزحمة
مسيري ارجع والاقي حبة مني فيه
بحب العود
بحب العود

27 comments:

اسامه عبدالعال said...

الله ينور يافنان

ساره said...

ياسلام ياخالد عشت معاك الوصف
وخليتني احب العود

ياسمين حميد said...

الله
عدت للكتابة فأبدعت
أنا أيضاً أحب صوت العود أكثر من أي آلة أخرى
هل تعزف العود؟

ياسر حسين said...

مش عارف ليه حاسس أنها ممكن تتغنى على لحن في قلب الليل
أغنية على الحجار الشهيرة
لحن مودي الإمام
على فكرة .. أنا كمان بأحب وبأعزف عود
:)

خالص تحياتي

مواطن مصرى نايم said...

و انا بقى حتى لو مش بحبه بعد الكلام ده بحبه

ايوه كده يا فنان
عاوزينك دايما معانا

يا رب دايما تكون بخير
و دايما مبدع كده

تحياتى

اسلام

adel said...

انا مكنتش بحب العود قوي....بس شكلي كده هاحبه :)

بجد رائع و الكلام و انا بقراه حاسه متلحن جاهز

و لو عايز تعتبرها مجاملة اوك...بس صدقني دي اجمل حاجة قراتها منذ فترة طويلة

عادل
http://elbald-dy.blogspot.com/

Anonymous said...

very touching,,,the more i follow u ,the more i get impressed!!u r multitalanted,,,

عاليا حليم said...

الأبيات بتجسد بأداء تلقائى ملامح أنسانية لوجه من لحم و دم كنت بتخيل العود من طفولتى عليها العود فى خيالى شخص له عنين و فم وو الأبيات دى خليتنى شايفة الخيال ده حاجة ملموسة قدامى لاول مرة

ruba said...

جميل وصفك للعود ، بحس أنو بيعبر عنك :)

تحياتي القلبيه

Bipolar-Girl said...

علشان كده انا بعزف العود

hamama said...

الى الأستاذ خالد العزيز
في أحلى يوم بالشهر حبيت أسبق البشر وأهنيك بميلادالعمر
وأطلب من ربي يحفضك طول الدهر
و بالمناسبةالعود جميل جدا و من أحلى الألات التي تغنى بها كرم محمود و حتى الناي جميل و سلم الأيادي يارب التي كتبت على العود مانتحرمش من مواضيعك
القيمة عيد سعيد و كل سنة وأنت يخير
حمامة

صبري سراج said...

الله عليك وعلى احساسك وابداعك

بجد انت موهبة مرعبة

ما شاء الله عليك

دعاء مواجهات said...

انت حد جميل اوى

وانا بحبك اوى بجد

متابعه لامدونه من فترة

بس البوست دة

اجبرنى انى اقولك

انك بتاكدلى انك فعلا

حد جميل اوى من جوا

تحياتى ليك

اتمنى اشوفك عندى

KHALED-ELSAWY said...

شكرا شكرا يا اجمل الاصدقاء:)
ياسر معرفش انك بتعزف:)
ياسمين ايوة بعزف على قدي وباخد دلوقتي دروس مع صديقي جون نجيب علشان أحسن عزفي وعلى فكرة أنا بلحن أغاني مسرحياتي عادة وقريب قوي حتسمعي ألحان مسرحية اللعب في الدماغ على النت.
باي-بولار عاجبني اسمك قوي لاني انا كمان مزدوج القطب وعندي ملاك وشيطان ساكنين سوا:) وكمان حلو الاقي بنت بتعزف عود لاني مش فاهم ليه زباينه قليلين من البنات:)
حمامة الف شكر بس انا لسه عيد ميلادي 25 في الشهر بس فعلا انت اول حد يقول لي كل سنة وانت طيب الف الف شكر:)
دعاء مواجهات حلو موت اسمك:)
شكرا جزيلا يا اصدقائي جميعا ومنتظر تعليقكم على قصيدة اوباما:)

maro said...

دولسينا

الله عليك يا خلود انت عارف ان العود اكتر اله بعشقها و بيتهيئلى ان غيرى كتير كدا برضو
شوفت اميمه خليل مغنيالها و قايله ايه



يا عود يا رفيق السهر يا عود
متكى على المخمل تتوجع و بتروح ع اخر دنى و ترجع
تكتب و تمحى حدود يا عود
...
احكيلى ع سهريات فى قصور كله رخام و نوافير و تشعشع الكاسات
ع خصور تتلوى و حرير يطير
...
حيران ما بتنام
يا عود

Anonymous said...

ازيك يا استاذ خالد تسمح لي اكون من اصدقاء البلوج بتاع حضرتك
انا متابعه دايمااا
بس حبيت احييك بجد علي قصيده العود ووصفك الرائع
وكلماتك الحساسه ومش غريبه ان حضرتك بتعزف وتلحن كمان لان الفن اللي جواك
يقدر علي اكتر من كده
تمنياتي بالتوفيق الدائم
وكل سنه وحضرتك طيب

S said...
This comment has been removed by the author.
S said...

ازيك يا استاذ خالد تسمح لي اكون من اصدقاء البلوج بتاع حضرتك
انا متابعه دايمااا
بس حبيت احييك بجد علي قصيده العود ووصفك الرائع
وكلماتك الحساسه ومش غريبه ان حضرتك بتعزف وتلحن كمان لان الفن اللي جواك
يقدر علي اكتر من كده
تمنياتي بالتوفيق الدائم
وكل سنه وحضرتك طيب

كلمااات

nehad zaky said...

دى من اجمل القصايد اللى قريتها وعجبتنى جدا

انا كمان بكتب شعر بس مش حلو اوى كده على ادى

وبحب العود جدا عشان بحس انه بعبر عن الشرق مفيهوش حاجة غربى نغماته اوتاره شكله كله شرقى من دمنا وكمان الل حببنى فيه عبد الحليم حافظ وفريد الاطرش لأنى بحبهم جد

بس عمرى ما فكرت اعزف عود

بس بجد قصيدة بشكرك عليها

وينكى said...

قلت قبل كده انك عايش بالعود
ومش عايش ليه
دلوقتى اتأكدت أكتر
وان كنت أقدر اخمن انت ممكن تعيش لايه بعد كده
عارف لما تحس أول ما ايدك تلمس العود وتداعب اوتاره.. كل نغمة حزينة تطلع منه بتحكى تاريخ
كل جمله اتولدت بين اصابعك تتحول لوصفة سحرية تدوب فى الهوا وتدخل القلوب وتجرى مجرى الدم
فيروس لا يطلب حامله الشفاء منه
يصيبك فتتمنى ان تسقط طريحه
وتشفق على ذوى المناعة القوية ويمكن لأول مرة تتمنى ان كل البشر
يسقطوا صرعى هوى العود
سامحنى على غيابى الطويل
لكن الطير مهما يبعد عن عشه لازم يرجعله من جديد

RamyBoulos said...

عود جميل
و فنان أجمل

Anonymous said...

خالد الصاوي فنان صدق الأحساس فصدقه الجمهور بجد بيعجبني كل أعماللك وياريت نبقى أصدقاء

Anonymous said...

My Dearest Khaled el Sawi,

I always knew you're a great artist, ever since the very first time I've seen you... And now, I'm re-discovering you all over!

You're very talented, and you're a respectable artist and person... Best of luck for you...

Laila

mimo said...

مش ممكن تعبيرك حلو جدا واحساسك عالى وخيالك واسع جدا وكلام موزون وانا عازف جيتار وبحب العود جدا وانا شاعر على فكره برضو

egyptianstriker™ said...

الخقيقة أنا مذهووووول ..
الكلام جميل جدا جدا ..

حقيقى معنديش وصف يليق بقيمة و روعة الكلام ..

دعواتى لك بالنجاح و التألق دائما يا أستاذ خالد ..،

mai قلم كحل وقلم جاف said...

انا عجباني قوي
مع اني بحب الناي
بحسه بيحزن باصاله
ويبكي بعمق
شجي

.Salma A. M said...

بحب العود :)
حسيت انها تصلح انه محمد منير يغنيها :) على عود