ثلاثين سنة

ثلاثين سنة يا شيخ حرام
جَوَّك أليم
شكلك قديم
لأ والأكادة انك حترحل بعد عمر.. طويل.. طويل
وتسيبلنا الواد الثقيل
يلعب في باقي عمرنا
شوف الدماغ بنت الحرام
يا شيخ حرام

الثورة بكرة يا سيدنا فوق
ده بكرة تحت حيبقى فوق
واللي اتفحت من نور جنابك عمره كله واتخنق
من حسن حظه يجيله يوم.. منك يفوق

بتلوم عليا طول لساني؟
لوم عليك طولة إيديك
مطرح ما اقول ألقى القلم
ومنين ما اروح.. متقفلة
الشاب عجّز من زمن
وبلدنا سقطت مرحلة
انت اللي فاهم كل دبة وحلها
وانت اللي عارف إيه الحلال وإيه الحرام
وانت اللي أطول مالجميع
وانت اللي أحكم من حكم
وانت الحكم، وانت العَدَل
وانت الهرم، وانت الصنم
وانت الحقيقة المزمنة
وما خفي فيك.. ما أعظمه!
إسكندر المقدوني بس طراز جديد
جثمان حديد
فؤاد جليد
وعقل أغرب مالخيال

وحق عشرتنا الطويلة يا شيخ بقى
إخلع بقى
فرصة المطار فاضي ومالطة مريَّحة
والشغل مش على ودنه لسه يا عرب
ده الجاي لوز عالناس، وعلقم عالردي
لون الحياة يرجع فَروزي
والناس مزاجها زمردي
واديني يد على يدي
والنعمة تكفي.. ونكتفي
بس اختفي

26 يناير

أرض السويس

قالوا: السويس مولعة، أنا قلت: إيه؟!
صهيوني ثاني ولا إيه؟؟
قالولي: مصري! قلت: ليه؟؟؟
قالولي: عبد وكتِّفوا برشاش إيديه

يعني السويس الحرة ست البيوت
إللي الشهادة تحتها تصبح مزاج
تصد جيش داوود بغنوة سمسمية
وشبابها يأتوا المعجزة جوة الطاغوت
ييجي عليها اليوم وتولع من نيرون؟؟
والشعب ياخد طلقته في الظَّهر ليه
والغدر مين دلُّه على بيوت السويس؟

يا عبد وانت مسلسلك عبد ابن عبد
ومسلسلين كده كلكم جوة التابوت
يا موحشين شكل الحياة.. يا ناس روبوت
بالأمر تفهم، وان فهمت تموت قوام
شنبات غليظة والعصا وكروش تقرَّف
ودم أهلك في الهزار لا تقول وتوصف
تضرب قنابل في السويس إزاي يا نيلة؟
وتنسى نفسك في الدمار وترد ديب
ما تقولش مصري اتحرمت والله عليك
الشكل واحد واللسان والغمازات
بس القساوة حفَّرت جواك خرابة
تمد إيدك بالغبا على ناس غلابة
وتجرّي أصحاب البيوت جوة السويس
يا ضيف ثقيل.. يا عار يا شوم
الموت مفحفح من هدومك والبيادة
يا خسارة التعب اللي راح على دي الرباية
يا ضبع، يا محتل، يا نحس الجراد
يا خاين اللقمة، يا دون، يا ابن الحرام
خسارة فيك والله التحية العسكرية
وان مت ما تعتِّبش من باب الشهيد
يا شيء، يا ميكروب التعاسة والأسى
يا عبد خانع بالنجوم والكتَّافات
حل القيود وارتد راجل مش نفر
وخللي عندك مالخشا ومن النظر
ده انت في سويس الحب في سويس المقاومة
يعني انحني واخشع.. وإخلع ناعِليك
ملِّس على بيوت السويس والسمسمية
طبطب على البحر الكبير والبمبوطية
واطفي السيجارة عند شارع الاربعين
ومللي عينك ماللي كافحوا من سنين
وارمي الحمول في المينا واركبلك بلانص
خش استحمى اياك تفوق
وصلي-مسلم أو مسيحي- خش صلي بالدموع
ياللي انت راضع غاز مسيّل للدموع
وكُح دم اياك تعود زي اما كنت
تترد لك حتة ضمير
وتتوب على أرض السويس

27 يناير