Thursday, October 14, 2010

مصر بتقع

مصر بتقع... ولا حد سائل
لا من يداوي الوجع
ولا من جواب للسائل
الكل شايف.. بس عامل شبح
والكل خايف.. عالمسائل


مصر بتقع من طولها وسطينا
مصر بتقع.. وده سلو فيها.. وفينا
هي اللي بترضع وبتهنن وبتكبر
واحنا.. نكبر دماغنا
وعليها نتكبر


مصر بتقع.. مصر بتقع تاني
بحلم آخدها ف حضني وافديها
وآخد في صدري الضربة واتحمل
وأفز احن عليها واحميها
واللي انكسر.. يركب بداله جديد
وعلى المحارة نرصها ونبنيها



مصر بتقع.. لكن ما بتموتشي
الموت بيوصل عندها ويعطل
الفقر يقسى.. هي تتحمل
والقهر يستغبى.. فتتجمل
والذل يلبد في الكلى
ومرة واحدة تبصله.. يمشي
وترش ملح ف عين زمن جاحد
من بعد ما انفك الهرم أشلاء
بقدرة غامضة يلتئم واحد
من بعد موتة ووقعة سودا سنين
تنده بنيها يطلعوا ملايين
كوكب بحاله يندهش ويبلم
ازاي بتكبش بحرها من زير؟؟
ترد مصر: دي معجزة أوزير
واقوله انا:
الموت علينا حق يا صاحبي
علشان تحق علينا تاني الحياة
وبعد موتة صغيرة زي الكابوس
من موتي يطلع شجر
وتجري تحتي المياه
وارضع حليب طاهر من الطاهرة
من ستنا.. ام البشر.. ايزيس


مصر بتقع.. والعهدة عالراوي
ومفيش عليها خوف يا مصراوي
الخوف عليك انت اللي مش ناوي
تموت وتصحى زي أجدادك
من كثر ذلك قلت: ده غاوي
مع اني عارفك.. لو عشقت ملاك
ولو كرهت.. تكفر الابليس
وانت اللي قادر ترد فيها الروح
وتعيش معاها زي زبدة وعسل
وتفرحولكم بقى.. من نفسكم.. يا عريس

34 comments:

Unknown said...

إيه الوجع الكبير ده ... الوقعة كانت من زمان

رائعة جدا

السقا said...

اهدى واستني يا مصراوي
وماتقولش اصل انا حاوي
وتهج على بلاد البترول
وتقول اعمل قرشين ... دا الزمن مش حايطول
ولا تروح على بلاد الفرنجة
وتقول اصل الكرامة هناك متصانة
دا على راي المثل من خرج من داره اتقل مقدراه
اصبر يا صاحبي دا الصبر جميل
اصبر دا لسة فيها النيل
ازرع واحصد وكبر بلادك
بدل ماتسيبها تخرب ونهد بيوت اولادك
مالناش غيرها هي مصر
يبقى خلاص نسيبها ونخدم في بلاط القصر
عيش فيها واتهان فيها
بدل ماتهينك الغربة وبلاويها

Unknown said...

bgd to7fa masha2 ALLAH 3aleek ya ostaz 5aled
we ya rab masr t2oom men el wa23a elli heya feha di ya rab we nfoo2 ba2a
we montzrin ba2i el kasa2ed bta3et 7adretak ISA

Unknown said...

جميلة أوى ياأ.خالد

بس مش الكل عامل شبح

طول مافى كتير زى حضرتك لسة فى أمل
وإن شاء الله تقوم تانى

marrokia said...

رائع رائع رائع
شعر العامية دوما يكون مميزا

Anonymous said...

تحفه بجد :)

monayamyfate said...

جميلة قوى فعلا حلوة بجد
هى فعلا مصر بتقع

مصر بتقع.. والعهدة عالراوي
ومفيش عليها خوف يا مصراوي
الخوف عليك انت اللي مش ناوي
تموت وتصحى زي أجدادك
من كثر ذلك قلت: ده غاوي
مع اني عارفك.. لو عشقت ملاك
ولو كرهت.. تكفر الابليس
وانت اللي قادر ترد فيها الروح
وتعيش معاها زي زبدة وعسل
وتفرحولكم بقى.. من نفسكم.. يا عريس

عمرو يسرى said...

الله الله الله
ايه الجمال ده
اكثر من رائع يااستاذ الخالد
تسلم

lobna mhmoud said...

جميلة جدا وموجعة وفيها امل كبيييير برضه احب ان اسميك المبدع وليس الفنان

egypt3010 said...

السلام عليكم
اشكرك حضرتك على تلك الكلمات الجميلة ,هذة لم وان تكون اول كبوة فى عهد مصر مصر مرت بازمات كثيرة واحتلت فيما يقارب 2000 عام نحن شعب لا يعمل إلا تحت الضغط فى الازمات المشكلة ان احنا بنستسهل حتى فى احلك الامور ووجهة نظرى ان احنا لم نحاول التصالح مع انفسنا ومع الدولة للسير للامام ونحب نعلق اخطائنا دائما على الاخرين لو معنا رزق بكرة ننام ومنفكرش فى بعد بكرة وان شاء اللة ترجع مصر تانى ام الدنيا شكرا ارجو التعليق

ُEhab Shaaban said...

مصر وقعت من زمان ، والعهدة على الرائي
قيامتها صعبة ولو انه مش باقي
غير إني أدعي مايكونش مستحيل
تتجدد حياتها ومايخبش ظني
حلمنا كبير ياأستاذ خالد وربنا يعينا

Noha Saleh said...

يمكن هى فعلا بتقع من طولها وسطينا
معاك حق
بس اكيد هترجع تانى تقف على رجليها وتكون احسن
لانها ياما وقعت ورجعت تانى وقفت

بصمة للحياة said...

أه كبيرة من القلب على ما يحدث في مصر .. أمل أعيش عليه إني اشوف مصر منصلح حالها قبل ما ربنا يقبض رووحي

أستاذي الكبير مؤلم بحق ما كتبت

فتــافيت (رحاب الخضري) said...

طول ماهم مش فالحين غير في كتم نفسنا هاتقع
طول ما كل اللي في دمغهم
يوقفوا القاعرة اليوم
يمنعوا علاء الاسواني
يقلوا الناس
يحجبوا الفايس

هاتقع وهاتقع وهاتقع

الخبز و الحرية said...

صباح الخيرات
أشكركم جدا
أنا من المتفائلين رغم كل شيء.. وساعات بدفع تمن ده غالي من الاحباطة تلو الأخرى.. لكن برضه برجع أتفاءل.. يمكن عشان مدمن تاريخ.. والتاريخ عموما وتاريخنا بالذات مليان حركة وجدل.
نتمنى تغير الأمور قريبا.
حبي واحترامي للجميع

nada said...

اشكرك على القصيدة حلوة بس توجع انا متفائلة بس هى المشكلة انى حسة لية ان المصريين اكبر سبب فى اللى وصللوا دة انا قرأت فى التاريخ والسياسة وعلى قدى كدة حسيت ان المصرى لا يعمل الا تحت ضغط بطبيعتة مش طموح لو معاه رغيف بكرة مش هيفكر فى بعد بكرة بيستهل والطموح بيدوس على الكل فى طريقة هل ده حقيقى ولا الشعب اخلاقة اتغيرت وده حصل قبل كدة ولا لا ارجو الرد والتعليق شكرا
ندى

Faith said...

مصر الام الحنون لا يمكن ان تقع بوجود اولادها البررة حولها يحيطون بها و يردون عنها الطامعين والاثمين....

Bvcc said...

الله عليك ياخالد انت مش بس فنان محترم انت كمان طلعت مصري محترم بيحب بلده اسمحلى اسجل اعجاب بشخصك بالذات وطبعا اعجابي بفنك ده شئ مفروغ منه انا من زمان وانا بتابع اعمالك كنت بحس بشئ غريب بيشدني ليك وكنت بقول لنفسي اكيد شخصية خالد الصاوي تنطوي بداخلها معاني كتير حلوه والان قد صدق حسي وتأكدت من ذلك احيك على وطنيتك وهو ده الفنان الحقيقي تقبل تحياتي وتقديري

تويا said...

انا مفروسه
خالد الصاوي غير انه ممثل مفيش منه
كمان شاعر مفيش منه؟
انا زهقت بجد من نفس وحاسه اني مليش لازمه

الخبز و الحرية said...

شكرا لكم مرة أخرى
ندا لا يمكننا انكار الأثر المدمر لطول عهود الاستعباد وخصوصا على أيدي المحتل الأجنبي لما يرسخه من شعور بالدونية.. قرون وقرون من معاملة الانسان كمواطن درجة ثانية مع مزيج الفقر وخيانة الثقافة الوطنية والقمع.. مكونات تدمر أي شخصية قومية، ولكنا نستطيع مع ذلك أن نرصد ونفخر أيضا بما استطاعت الشخصية المصرية أن تقاوم به وتتماسك رغم تتالي المحن.. وهو ما يمنحني دائما التفاؤل والأمل.
تحياتي للجميع واشكركم على اهتمامكم

nada said...

اشكرك على سرعة الرد ولا انكر اقتناعى بالاجابة حضرتك مشترك فى حزب ولا شايف انة مش مهم ارجو متكنش اسألت رخمة ومملة

Hebba said...

Me too, i am optimistic and know that one day things will change, and i will have again my country, which i used to love.
things might be bad now, but it is up to us to change it or leave it to sink.
the post is as usual, very beautiful and words are so touching.

Hebba said...

a beautiful blog. it is my first time to surf in it.
all members here are welcome to check my blog as well, whenever you have time

ساعه الغروب said...

ما هو للاسف اصلها عمرها ما عرفت تتألم طول عمرها بتبكى جواها لما حاجه تؤلما

بس خلاص انينها اصبح بيوجعنا اوووووى وبيهز كل كياننا

يا رب نقدر فعلا نغير الواقع اللى واجعها وعلى الاقل نسندها فنلحقها قبل ما تلمس الارض فى وقعتها

كل تقديرى واحترامى

Bassant Alkattan said...

استاذنا العزيز
قصيدة جميلة جدا وأحلى مافيها صدقها وايمانك وايماننا جميعا انه الاصلاح مش مستحيل ومش هيكون الا بايدينا احنا
بس اللي انا مش قادرة افهمه لحد دلوقتي
ليه الناس يا إما معندهاش القيم والمعاني دي وجزء اصلا مغيب ومش فاهم، واللي فاهم الحاجات دي على قده مضلل واللي مش مضلل قلة قليلة.
الواقع ده هو اللي لازم يتغير وصدقني الاصلاح بعد كده هيكون شئ بديهي

shams eldaly said...

كلام متميز من قلب وعقل شاعر
شاعر بالالام الوطن والالام الناس
فنان حقيقى متميز

صفاء said...

استاذى القدير و المبدع خالد الصاوى
مهما مرت عليها المحن و الازمات ستظل مصر مهما فعلوا لن يصلوا الى مايريدون ولن ينالوا منها ستظل شامخة بمن هو مثلك له هذا القلب النقى الذى ينبض بالحب و يتنفس عبيرها اسمح لنا استاذى انا نشاركك الحلم حلم الامل ان تشرق شمس الغد وان تعود مصرنا ونعود معها
بحلم آخدها فى حضني وافديها
وآخد في صدري الضربة واتحمل
مهما اتألم وتتالم مش هنبطل نتكلم سيظل نبضها فينا يبكينا و هتمسح يوم دمع عنينا و تحلى من ثانى ليالينا
القدير خالد
نقول لمصر
قومى يا مصر و انتفضى و حققى الباقى من املى و امسحى دموع اولادك الطيبين
وفى النهاية
العيب مش فيك يامصر
العيب فى البعض من اهلك ياريتهم ماشربوا من نيلك كان اهون لك ولا عاشوا ولا اتولدوا على ارضك
من قسوة ناسك مبقوش حراسك
عزيزى الفاضل خالد
لو سمحت لى ان اقول كلمة بسيطة الى الاخت ندى
الشعب المصرى على مر التاريخ يمتاز بالاصالة مرت عليه ازمات متتالية ولكنه لم يفقد الامل مهما كان الالم يظهر المعدن العريق فى الازمات ويتصدى لها و يواجهها و يتغلب عليها وليس صحيح انها لا يعمل للمستقبل فرق كبير بين الرضا بما كتبه الله من رزق و محاولة زيادة هذا الرزق وبين التواكل و عدم التفكير فى المستقبل
مصر بارادة شعبها هزمت الاعداء ولا انكر الان بانها تمر بمرحلة صعبة ولكن ليس كل الشعب مثل ما تقولين التعميم فى بعض الامور امر خاطىء ولا يجوز ان نقول ان كل الشعب يتصف بصفات معينة و لكن تغلب على الشعب بعض الصفات مثلا مثل الكرم و الشهامة و لكن مع الاسف نعمم الشعب المصرى الاصيل لم يتغير و لن يتغير سيظل بقيمة ومبادئه و لا ننكر وجود بعض ضعاف النفوس ممن لا ينتمون الى مصرنا الا بالاسم
كلمات رائعة من قلب محب وفى وقلم مبدع راقى لامست الجرح النازف ومهماكانت مساحات الالم بداخلنا
سيظل الامل فى شمس الغد
لك كل الود و التقدير
تحياتى و تقديرى للجميع

dr_tharwat said...

مفاجأة غير متوقعة ان ارى خالد الصاوى الفنان الرائع يحمل كل هذه المواهب فى الكتابة والغريب اكثر انه يبدع فى كتاباته كما يبدع فى تمثيله
خالد الصاوى انت كتلة ابداع تحمل لقب فنان

ماسة الحب said...

كلامك مؤلم اوي رغم ان انت في تعليقاتك قلت ان انت متفائل
بس بحد الكلام مؤلم بس حقيق اوي عشان كده بيوجع

Unknown said...

مصر لو وقعت هتقع علينا نموت إحنا تحتيها وهي تفضل فوقينا

DR said...

When I first moved here, people thought I was crazy, “7ad 3a2il yi-seeb Amreeka wi yigee Masr?! Idooha talit sineen…la2! Talit shoohoor wi hat shoofoo…hatseeb masr wi triga3 Amreeka!”

That was over 9 years ago, & though I still hear that very same line (almost five times a day, like the “athan”!) I still persist on living here.

Think about, if all the good people leave, then who is left? Or even if people don’t leave, but become preoccupied by the thought of leaving, which is the prevalent thought of today, what you get in the end is a complacent society; people who have given up completely.

The truth hurts, but it is within us all to change this ugly truth. We have to start with ourselves & stop the cancerous thoughts of “nafad” or “kabbar” or “ana fi eedee ay a3milo?”

Yes, there is A LOT that needs to be changed, the biggest of which are the values “al akhla2”. This was NOT the Egypt my parents told me of, but I am VERY hopeful that one day, insha Allah we will all “foo2” & help our country stand back up on her feet.

Anonymous said...

مصر تتهاوى وكل الشعب يتوارى
شايلين همومناوف اكل العيش نتبارى
عايزين نفوق...لكن الضرب متلاحق
يارب عينا نلم بعض ونشارك

Anonymous said...

ما قرأته هنا قد يمثل في نظري المثاليه التي لم يعد يُصفق لها حتى لو امتلئت تلك الصفحة لك بعبارات الأعجاب والتشجيع

انا هنا لست قلم ساخر او وحرف محبط لك

استاذي لستم الوحيدين اللذين طالتكم ايادي الضيم والشقاء لو تمعنا في تاريخ مصر العريق الذي لا احد ينكره سنجده تعرض لنكسات واحداث مريره التي اجد ان اثارها المتبقيه لم تكن اخف من تجاوزكم لها ولكن

عادتاً وفي الحياة اليد المنهكه بالعمل والكتف المثقله بالحمل الثقيل تكون اكثر تحمل لأوزان الوجع المنتظره على قارعة الطريق او خلف ابواب المستقبل

او تحت مخدة الفقير كحلم صغير لا يمتلك حتى اجنحة العبور المتاحه لدى اي مواطن عربي نبيل بـ اعتبار انها من ابسط حقوقه

انا وانت والكثير من من وصفتهم بالمصراويين او المتغربين الذين صرنا نحن اصحاب المكان
نحس بـ احساسهم اكثر منهم

فما رأيك الأن

من فتاة من بلاد عربيه يظن الجميع وربما انت منهم

ان كل من يعيش على سطحها امير واميره

وبالبلدي دول مولودين وجوا بؤهم ملعقه دهب

لا يا فنانا القدير

اتعلم اننا اصبحنا نحسد الأن المغتربين منكم الينا

لأنهم اصبحو يملكون ما لانستطبع امتلاكه

بحجم صراحتي هنا والوجع

ارحل اسفه ان كانت تلك كلماتي انتهكت عذرية وطنيتك

انا فقط كنت افضفض ربما تصل معناتنا لحد التعميم

ونصبح بدلاً من ان نرثى حالنا بشكل فردي

نرثي احوال الأمه جمعا

وبالبلدي مش الخير يخص والشر يعم

فما طالكم فقد طالنا وما صابكم اصبح مصابنا

اخيراً

اشكر مقدماً سعة صدرك وجمال مدونتك المنبعثه من جمال فنك وروحك



...


امل عربي

david santos said...

Hello, my friend!
how are you?
I love your work. have a nice weekend.