أولا وعاشرا وألف ألف.. هه!!
——-
مصر اولا وباسمها نشيت
ومصر ثانيا لقيتها أعز بيت
ومصر ثالثا عطتني لم عطيت
ومصر رابعا لساي ما بنيت
(وليه لساي عاجز؟
ومين كتف دراعي؟
وليه عدوي جاهز؟
ومنابي مش بتاعي؟)
طب مصر خامسا من قبري واتناديت
ومصر سادسا لبيكي دوغري جيت
ومصر سابعا في حمايتي ما حييت
ومصر ثامنا شهيد ولا اكتفيت
(عييت خفيت بحبك
ومرضت بكبريائك
وكل علاج لحبك
بيضاعف اشتياقك)
ف مصر تاسعا عطتني فاغتنيت
ومصر عاشرا بالدم لها مضيت
وصتني الإنسانية صديت وما اعتديت
وحرمت عليا حرمت ما حليت
(دنس طمع نجاسة
تطبق على الميزاني
دم وظلم وخساسة..
طبيت في الامتحاني!)
جدي الكبير لحمنا
ما يحلنا الشيطان
خَلَفوه زراع وبنا
سلف جند وكهان
لضم الصعيد بحيري
ورشيد خد مالدمايطة
سينا/سيوة.. خط سيري
بسواحلي بقالي خارطة
(سلام سيدي الموحد
المجد يحب صلبه
مينا وضاحي والاحمد
سمك ف بحر شعبه)
ييجي ست آلاف ونصه
سلسال فارد جدايله
أم الشعور في رقصة
صفصاف للمي مال له
الله عليكي أمة
وماشا الله خلفتك
من فرط الأشيا نعمة
حاضنك مكتفك!!
(أمه وآبه وأختي
وبناتي وبنت عمي
وأعمامي برضك إنتي
وعديلي وسلفة امي)
يا مصر يا أولا
يا مصر يا أولي
يا كلي في الزمن
فرعة وبتوصلي
سلام سلاح وسلمي
ومربع شحط محط
لفني، كمان لعلمي
وملخلخ ويا بط
واللي بنى فأهرم
نتع الحجر مسلة
عظيم وسعيه أعظم
فتح على (أين الله؟)
لهذا الله معك
يا مصري يا عمهم
ولذاك بنسألك
قوم يا حي من العدم
....
حي حي مدد مدد
بنت مصر مع الولد
والبلد دي اولا
ثانيا ثالثا
كلنا نقرا ونشهد ربنا
أيد في أيد
أيد دهب وأيد حديد
واللي جاي صعب واحنا
احنا بس نسهله
والوليد حنسلمه
يوم جديد
طاقة ضي
واسم مصر من الأوائل
وبكده نعدل ما مال
يا بنات مصر يا مجدع
يا بني بلدي الرجال
الرجال علي حق بس
وبكده أكون وصلت لخاتمة
في الكلام
والنفير يعلن : لقينا عمر ضاع
وابن مصر أهو استطاع
قول يا رب
قول سوا
واوع تنسى
ان
مصر
