صبح يا حلو

صبح يا حلو

الله عليك يا صُبح صبّح.. وافتكرني
ولع يا نور
الكون ده طازة
والقلب صابح
على قلعة الكبش الفطار في السيدة والاصطباحة في البوفيه عند ام صالح
مترين في متر وبعد كم حجرين بتتسع المطارح
والصوت بيهدا وربع ضحكة وصوت معز بيسطل الأسطى اللي رايح
ويحيى قارش ملحة القاعدين جميعا..
عبحميد بيفخخ القعدة ويرمي الإفيهات مالعمرانية
وبيستلم عبد الوهاب ويباصي ثابت
ممدوح يرقص مولد الست في أغسطس
ومن مقام عالي ورصد الدرب الاحمر
وشوط يا ماهر شوط يا شورى هي جاية مقشرة
نهاوند سيكاه وحجازين
في الجون يا صالح يالحبيب
وضحكة فعلا طيبة من قلب طارق
وحكاية ثانية مصطفى ملكوت لوحده
الفاتحة عالشاب اللي راح ملكوت لوحده مع ملاك الموت
بسم الله
آمين
آااااه.. مين تفتكر وتنسى مين؟
خالد وعصر المطرقة
كازاتونا ..كود كان هو عامله لشلته
وجو سري وهو بس بيرطنه
واحنا بنترمى دموع والضحك كان ببلاش وتاخد وانت ماشي معاك كمان
وعبعزيز الديناصور ابو قلب بيبي
وعلاء يقول في المنتهى وأبعاد ياخدنا ونندهش
وثاني يوم نقزح معاه على سيدي سالم
نقول ونسمع نجري في الغيط السداح
والخطة والهدف المشلتت لو حنسمع ملحمة
وهنيدي ساكت يوم يومين وفجأة ثار:
يا عم انا حاجز مع الأشعار فطار
وخير بلدكم وانتو بيت العمدة من أيام خديو
يا تأكلونا زي أول يوم يا فركش
وهاتنا من تحت الحصير وحد يصرخ مالألم
بس اخرسوا والله مت من السعادة
عبدالله اظن.. أيوة افتكرته مفرتكاه بطنه ودموعه

يا شلة فقر وأغنى حاجة في عمرنا المغدور شبابه
مناشير تحف بترسمك على أبلاكاش
وجو كتمة وفيه مؤامرة تحسها
زي العميقة ما تتلمسش
ومعانا قرش معانا نص معانا جمعية.. شباب!
حنطير يا تحجز يا انت وظروف السبنسة
ولو معاك ولو معاكش حتشترك
اللقمة مية والجنيه مية قرش
وما تتحسبش في وقتها وكل يوم نعمل ونكسر دستورين
ودستتين من اللوايح
بالنية بس وحدس ورّد واستوى
ورومانسياتك إدي فوليوم
وافتح عيون الفرن والبوتاجاز وفاليوم
حابين بلدنا والبلد راكنانا حبة
فحبتين حبات كثير والوضع مؤلم
متمتعين وافر شباب متنعمين
ومدرجات ما دخلنهاش من أولى باء
وان رحت سكشن يحضنوك زي اللي عايد من حجيج!
رايح بحجة معلنة وضحك وضجيج
واللي في سرك حاجة أول حرف حاء
حاجة احتياجة وهات يا شعر
وبعد شهر تحب حاء صاحبة دعاء
وتقول في شعر
وفي العيون
وتروح آداب مولد وجو مفيش بدل زي الحقوق
دي زي لقصر في الاجازة بمية خواجة ومية جروب
والتانية زي مجمع التحرير بتخرط سحنتك
وتلبسك شبه المدينة الجامعية تعلبك وتربيطات
ناصر بيرفض عاطف اللي يحب هاء
وهاء بتقلب صفحة الوقت اللي راح
وشلة كم؟ خمسين قليله شلة واحدة!
ثلاثين ولد ساعات يباتوا نصهم في أوضة واحدة
وساعات جميعا!
وفين كمان؟ في المطرقة
في مبتكر من تكوينات لا من بناء ولا ديكور
العشوائية لما تاخد دكتوراه في الجيزة يمكن
عطفة في حارة في مزلقان في كمين فنجري
خد ياض هاتوهم طير ياله
معاك؟ مفيش.. معاك؟ وانت؟ امال ايه؟
جرينا ليه؟
لأن دايما الاحتمال وارد يا أوطة
في جيب صغير حتى لو حتة قريش
يبقى انت جاهز لانطلاق في أولمبياد جري الحواري
قفز الحواجز والعزب ولاختراق من العشش
مش كله فوضى وهنكرة
لا يا خال وصبراً إوعى تحكم عاللي جاري
مش كل من يجري في بلدنا لص خالع بالغسيل
أو بالجزم من قلب جامع
ولا كل من يجري وراه.. خالي يا عين مالمسخرة
واهو ده اللي جيل ورا جيل وجيل
لازم يجيب شعبك ورا
فيما يلي ما قد جرى:
صل على طه الرسول
والقبطي فينا يمجد السيد
ونحكي من ورا لقدام ساعات
وساعات ننط من الأمام
للخلف در
لا هو شعر فذ ولا درر
لكن حقول
والمبسوطين يا مرحبا
واللي اتخنق يرجع ورا
وخليك معانا
يمكن حجيب ودنك في بيت
أو حتة من حدوتة من حواديت.. يا ريت
نفضل صلة
زيدوا النبي زيدوا المسيح
واللي ما حبش ده عشان بيحب ده
واللي ما حبش ده وده حقه في سره
لو طلعه ولبخ كسر حُقّه
ده شعبنا وده سلو مصره
وكل زول يحكم في مصره
ودول جدارنا والعمُد ومحبة فيهم حبنا للأوليا
من حبهم للمحبوبين
وجنينة واسعة مصرنا وموكب نخيل
ومولفين بط وأنارب عالخيول
اكمن مصر مفرعة ومضللة وتحابي حنية ودفا

شجرة عيلتنا في مصرنا مادانا من الشام للحجاز
بغداد وقدس وحبلنا لأعمام هنا من عندهم
والجذر واحد عندنا
بيتنا الكبير
بيت سيده –جده- وسته -جدة جد ابوه-
والمصري لو تدخل عليه بالصُلب وبتوصل رحم
شوف الحفاوة والكرم
ما يحطهاش في بقه يديك لقمته
كل اللي طالبه تحب زيه حاجات بسيطة وطفولية
ما تشتريه ده المصري حلو
لكن تكابر أو يحس بتقصده
حيطلع الجُنينة واشرب أي شرب
وبلاش يحطك أي شعب في جمجمة متكلفة
وكفاية ده إنذار أخير لكل من شايل في عبه خنجره ومسممه
والمصري صايع واد قديم تعب أصبح هرم واثنين ومية
والضفة دكها خالات مغاربة وجيل من البربر
والجد نديله احترامه وله في داير عنقنا
طوقين ده ثار
والتاني دين
وانشد واقول
مدد يا مصر
مدد يا دار الأوليا
مدد يا أطعم شيء ولو..
دبل المهفهف ريحته فيه
وفينا سلسال الحلاوة وحلوة مصر
واللي بناها حلوجي حلو ونزيه
واحنا اللي شايلين الأمانة ودقلي
دقة مدد
مدد يا مصر

من شهيد تظنه حيا يسير بنا

من شهيد تظنه حيا يسير بنا
وأسد تخاله ابن ادم أدرك العدل زئيرا
من رجل تظنه أمة قدت من الصخر والملح
وحلم بارق وكنت تراه سرابا مبددا
سننقض

والله ان سعدني زماني

والله ان سعدني زماني لاسكنك يامصر
وابني لي فيكي جنينة وفي الجنينةقصر
واحيب منادي ينادي كل يوم العصر
دي مصرجنةهنية للي يسكنها
ولي بنى مصر..

سنك؟

-سنك؟
=حداشر الا شهر ونص
-أصغر سنة مالفصل!
=ايوة يا ميس
-اسمك نسيته
استنى أبص
خلاص لقيته
=خالد
ده اسمي
-يامي!...
طيب مكشر ليه؟
=أبدا يا ميس
-بتحب اسمك ولا ايه؟
=جدا
-يا جامد
منقول منين طيب يا فهمي؟
يا واد بهزر
=ما انا بضحك اهه
اسكندرية
-يا سلام يا واد يا ثقيل
ولا انت نكدي ولا دمي ثقيل؟
=ليه بس؟
-حنشوف
وجيت ازاي من اسكندرية؟
=مع اهلي جيت
عايمين على المية:)
-يا سلام بتعرف تهزر؟:)
=بعرف يا ميس
-ضحكت وشك راق
وشكلك اتغير
إياك تكشر
(كان يوم رخم
بقى يوم لذيذ
ضحكتها سكر
عطرها يخدر
يا ريتني مش تلميذ
يا ريتني كنت اكبر)
(سرحت فيها في عمومها
وفي خصوصها بصراحة
اول ما حطت حادي
على بادي شفت الواحة
حضنت عينيا ركبها
وحس قلبي براحة
وقلت ترغي براحتها
وتسيب لعيني الملاحة
خدت الطريق مالضوافر
عشر عرايس مية
ركبت موج ابيضاني
تهت ف شعاب مرجانية
واما وصلت الجزيرة
شفت الوسادة الهنية
والفج حلو ومخيف
بتودي فين يا ظريف؟)
-يا إبني ركز شوية!
(ابنك؟ بريئة ميس فلانة
والولد معجون خطية)
-وباباك ومامتك؟
(وانقطع صوتها شوية
الجو حرر فجأة ليه؟
وريقي ليه بسلامته ناشف؟
قلت اما اركز
عيب بقى
وجيت أبص في وشها
قفلت على عينيا الشفايف
اللون ده لونهم ولا ايه؟)
-يا إبني!
=آسف
-سرحان في ايه؟
=صدري.. وجع خفيف وراح
-تعبان؟
=خلاص
-قرب كده
وريني سخن
يا ابني قرب
خليني أجس
يا حرام
=يمكن عشان الفسحة شمس
-باين عليك طيب
باين عليك الأدب
تعال أقعد قصادي
(والله عز الطلب
عملت ساذج وهادي
وسحبت نفسي لقريب
ولا أحلى من ده فيو
منظر طبيعي بهيج
للحر برضه فوايد
والمجد للتعاريج)
-أحسن حبيبي؟
=اااه
جداً بقيت أحسن
-لسه في صدرك وجع
(وجع في صدري؟!)
=آه ده كان
دلوقتي لا
مفيش
-اخدك تحب العيادة
(خديني اي مكان
عاوز اروح وماجيش)
=شكرًا مفيش داعي
فعلا ما تتخضيش
-فعلا؟ أوكيه يا سي خالد
كمل وألف سلامة
الفرن اصلا قايد
طشت عليه ابتسامة
وبدلت حادي بادي
وطأطأت ضهرها
وخدت ايديها لفوق
فكت بديع شعرها
لمست مكان التوكة
وكشكشت وشها
موجوعة في سرها
همست رميت ودنين
بين همسها ونفسها
سمعت آه منها
حقيقي آه منها
ملعون أبوها توكة
لو كات دي آه منها!
حطت غويط همها
وبقها في الكوكا
(حقيقي يا بختها)
وهمست بيني وبيني
انت اللي الف سلامة
قلت اللي عاوزه بعيني
قالتلي بابا وماما!
=مالهم؟
-احكيلي عنهم
(ده وقته؟!
انت اللي احكي
عاوز اسمعك ياما)
لحن السكوت تقطع
هجم الهوا بزعبوبة
الفصل بابه اترزع
واتخضت الحبوبة
الله جميل الفزع
والأجمل الخصوصية
والصندل اللي وقع
والشعر لما اترفع
والدربكة اللي فيا
شغلت بقي في سكة
وعينيا سالكة ف غويط
احكي وتكتب فابص
تبص اعمل عبيط!
وبطرف عيني الحويط
قعدت اعبي في مقاطف
ايشي من خدودها ولون عينيها
وطول رموشها فركها لايديها
ولما وطت تلبس الصندل
بجد يعني.. حرام عليها!
حسيت ببندق لما ميكي دحرجه في نهر العسل
ووقعت بين بسبوسة بالقشطة وقطايف
رجعت وسندت ظهرها على قلبي
تمطيعة زي القطط
تتويبة زي البيبي
وضحكة زي البوسة اخر الفيلم
وقالت لي:
-طيب
ثانكيو يا حبيبي
لمت ورقها كأنها بتعزف
ودندنت مع نفسها لوردة
حسيت بأوضة نوم بتنده عالفرنده
وباب قزاز بيروح وييجي مع الهوا
وستارة طايرة من عمارة لفوق بعيد
وغسيل يطير كأنه طيارات ورق
وبغبغان يغمزلي ويقلد آهتها
وشمعدان بيلاغي شمعة وهو هايم
فردت قلوعها
خدتني فوق
صحتني بعدما كنت نايم
فردت خريطة سحرها
بالأمر صاري المركبة مشدود وقايم
قامت فقامت كل حاجة في وقتها
مينا بحالها بتستعد بأهلها
لفت ولفتني في بساط سحري وخدتني
الميس مدينة من بعيد في الف ليلة
الركن يضوي يرد ركن بعيد عليه
عصلج معاها الباب واتخضت لقتني
في كسر ثانية جنبها
والباب بدأ يصرخ
جنونتي طلعت حفتحه
والأكرة بتسخسخ
-يا حبيبي اهدا حتكسره
جري دمي في ايديا
دست بحماسي ونخوتي
ومصحتي النفسية!
طق الخشب على معدنه
شهقت وراه الغالية
-ثانكيو حبيبي.. باي
شكرًا لمن صنع الكعوب عالية
كل امتناني للكعاب الحيلة
للبطتين لا حمام ولا سمان
أهي دي دروس الهندسة الاولى
ودي خلطة الجغرافيا بالأحياء
سبحانه مبدع كن يكون إبداع
صور فواكه فيها من حواء
ومصورك على هيئة البستان
زرع الصبي وفي بذرته الأشواق
وشق بيننا البحر بالميزان
على بر انا وانت على الثاني
والبحر هايج موجه عيب وحرام
متمسمرة رجليا في مكاني
تضربني نوة تزقني لقدام
صدى الطفولة يرن في وداني
ياكله هدير الجاي ما الأيام
وماشفتهاش ثاني اختفت من وقتها
معرفش مين هي
لا سألتها
ولا سألتش عنها
ما حكيتش عنها لأي حد مع انها
قعدت سنين تظهر لي في الأحلام
اما في منام
او حلم يقظة
في الجيم وانا بنهج
في قهوة سرية
معرفش هي أخصائية
مدرسة
موظفة
جنية
خيال سراب او عقدة نفسية
دي اللي اسمها ما قبلها وما بعدها
عبث الطفولة والصبا كله انتهى
والعوم على الشط انقلب
لسباحة بعد البراميل
وغوص عرائس بحر
وقفزة الدرافيل
وهاتني بقى
غريق وبغرق
وان جه كموني في حر أصدافها
اتشد قبضة ملح واتسوح
مع ندهة النداهة
وغطستي طالت
بين الجزر وسرابها
وضل راجل بيخرج من مياه الصبي
ويلم دقنه عالشراع ويغمض
يشمها ويشربها
ويرد أعطش
هكذا
دواليك
سلام يا ريس
على الله

اوعى تخاف

اوعى تخاف
إياك تعوز
حتخاف..حتموت
حتعوز..حتبوظ
خليك فوق...
فوق الجوز
فوق نفسك
فوق العمر
والموت
اوعى
إياك
خدها فصدرك
كتم على سرك

وارشق كالسهم

حلوة المخاطرة

حلوة المخاطرة
والصلابة في محنة
حلو الميلاد من شبه موت
حلو الإيمان ما تشرحهوش
حلو الصفا بعد المنازعة
وأحلى منهم ناس تدعيلك تخف قوام 
فتخف

 

أين أنت يا خوف؟

أين أنت يا خوف؟
أين أنت ياحقير؟
أخفت الناس زمانا وأخفتني مرات
حتى عرفت ديتك العطنة
بدأت قتلك يوم صفعتك مجازفا بعمري
وطعنتك قبل أن أخاف
وعشت

نحب الحياة ولا نتسولها

نحب الحياة ولا نتسولها
نخشى الموت ولا نخشع له
نخوتنا اولا وأخيرا
نعيش او نموت كبرياؤنا يسبقنا في الحالتين
وفي الحالتين ننتصر