Sunday, November 05, 2006

عشر حاجات

عشر زهور راحت مني
وفي البوكيه فاضل واحدة
دبلانة تبكي من الوحدة
عشر طيور طارت مني
وفي الفرنده فاضل واحدة
بردانة مالخوف والوحدة
عشر سنين عدت مني
عشر سنين خمرة وحريم
لما الحرملك ضاق مني
سن الجنون ده من سني
والقصر من جند لوزرا
واقفين على بابي الفيروز
وعجوز أرسطو بيسقيني
الحكمة مالدنيا بالكوز
وف حضني مهرة يونانية
بديها من لحمي الجملي
وقاعد لنا مايكل أنجلو
على السرير يرسم فينا
كندوز بيطحن ف بتلو
ناكل صوابعه ونحتله
وموزار على الكنبة التركي
بيشد في اللاي السحري
ويقوللي كونشرتو الأحزان
عشر جياد هربت مني
عربي وحرة ومختومة
بالنار وبلجامي الدهبي
ونزار بينزف أشعاره
على المخدة يسيل دمي
وسمعت موتي من الشباك
شعبي بيصرخ آه يا سبعي
وصحيت لقيت جثة ف حضني
عشر سيوف رشقت فيها
ومؤامرة في القصر بتعوي
حتى الجواري بالسكاكين
طالعين على العرش المسكين
عشر سنين شايلين أعلام
بونابرت نط ورا سريري
الثورة قايمة من الحمام
والدم كان ماشي لقدام
ثعبان ومتثبت طيري
وتتار بتكسر مناخيري
وتشد بغداد من تحتي
حتى الجواري الأندلسي
سرقتني ف سلاحي وفرسي
وسقطوا الداية اليمني
بيقولوا كات حامل مني
فين الأمين فين المأمون؟؟
فين هم أولادي الملاعين؟
عشر عيال ماتت مني
اللي اتطحن تحت بلاطي
واللي خنقته بملاياتي
واللي دفنته ف لحم امه
عشر عيال شردت مني
والغابة واسعة وغريبة
وان جزتها ألقى الصحرا
وان دستها بحر هيولي
وقراصنة حمر يبصولي
عشر حروب كسرت صيتي
كل الشعوب دخلت بيتي
تشرب وتزني على موتي
وحاولت اقوم مالقيت جسمي
نايم عجوز بين الشبان
عريان ومتقادة الحفلة
عشر شموع تضوي ضلوعي
وتحرق الشعر الشايب
واما المسيح حاول ينطق
صلبوه على باب الأوضة
مفيش نبي يتشفعلي
إلا ويدوله بالكوع
سحبوني من تاجي وشعري
ورموني قدام المأمور
يوناني طمعان ف هدومي
وروماني يورث ف حريمي
غجري ويهودي وأعرابي
بيسنوا نابهم على بابي
بارمين شنابهم عثمانلي
ووقفت احارب في العالم
وحدي كسبع ملوش صاحب
عشر جيوش حاصرت جسمي
وجابوني من ديلي المعقود
آسف على السم الهاري
آسف على بحر الأحزان
القلب صار حتة لحمة
مصلوبة على فرعين من زان
انا مش أنا وانا زي زمان
مستنظر الحب التايه
وبحب شيء مش في الإمكان

13 comments:

albida said...

مش عارفة ليه أسلوبها فكرنى ب(البنت دى) مع الفارق الساشع طبعا فى المشاعر والأفكار

بجد القصيدة تدوخ من كتر جمالها... أكنك ختنا من أيدينا كده ووديتنا من القديم للجديد...من مايكل أنجلو لنزار... من الرومانى لليونانى... من الفصحى للعامية
ايه أعصار الأفكار ده كله؟

manal

الخبز و الحرية said...

أي خدمة:)

Anonymous said...

أستاذ خالد
ايه الجو الفظيع دا
وكأنها كانت رحله عبر الزمن
رحله لأرض فانتازيا حيث التقاء كل هؤلاء ممكنا
لكن فى الأخر حسيت ان الجو اتكهرب واتقلب ومابقيتش فاهمه ايه اللى بيحصل حواليا
بجد اتوهمت

nour said...

فى فيلم اجنبى لاشتون كاتشر من اروع ما شاهدت فكرتنى بيه كان بيلعب على التيمة دة
حلوة اوى
بس يا استاذ خالد انت زعلان منى و لا ايه؟مش بترد عليا كده بقالك فترة..طب ايه اجيب شيكولاته و آجى اصالحك؟

الخبز و الحرية said...

متشكر قوي يا روماه:)
زعلان منك ليه يا نور؟؟ بلاش أوهام:)

متشكر يا عطوف:) تعرف انها من القصايد اللي اتكتبت وان شوت؟ قعدة واحدة قصيرة بس بمشاعر مكثفة.. بحب النوع ده من الكتابة بصراحة اكثر من اي كتابة تانية..طبعا في الشعر تحديا لأن فيه أجناس أدبية تانية ماينفعش معاها كده.

Anonymous said...

Sit with me
Wont you come and sit with me?
It's cold and crisp, its also clear
the sky that is
come sit with me
My nose is cold, my kettle's burning
I have questions , i have a yearning
I have a need for your hand
to take me through the maze of why
to shush me really, should my eyes intend to ...
I know you know beyond my knowing
I know you laid the tiles
long before my bones were growing
I know that if you would explain
I would not understand
so sit with me
Just sit with me
I really only need your hand

Deliberately Anonymous

الخبز و الحرية said...

جولييت فيه شغل بيني وبين رقم 10 :)
شكرا عايدة:) انا بحب الجزء ده كمان.

انونيموس ايه القصيدة الحلوة دي؟ كتابتك؟ وبتكتبي انجليزي بس؟

nour said...

طب طمنتنى..:)

Anonymous said...

yes it is mine, I am not as good in arabic

Deliberately Anonymous

^ H@fSS@^ said...

having so many people in one poem is a true idicator of how lonely someone can be, thats an explanation of dreams and thier sagnificance, if someone dreams being alone, it means they are surrounded by alot of people who love them, if the dream is of so many people that r not connected directly, then they are utterly feeling lonely. i dont like to know the interpretation of a poem coz in so many cases it is just pure (7ala she3rya) and the poet needs to express it, but if u r feeling lonely, u r not alone in this ( funny, isnt it, not being alone when u feel lonely) and i hope u feel accomodating with it, thats if words have any meaning or value.




p.s. i feel am halucinating, if so , someone please stop me.:)

albida said...

Darling u're not hallucinating... sometimes one can be lonely even when surrounded by millions of people
It's not about how many people around u but who r the people around u?

I like ur words "if u're feeling lonely, u're not alone in this... not being alone when u feel lonely"
u're absolutely right Hafsousa
:)

manal

الخبز و الحرية said...

ايوة يا حفصة متهيألي تحليلك صحيح لحد ما.

maha said...

سلام عليك يا استاذ خالد
ايه الروعة دي .........بجد تحفة
حسيت بفانتازيا في الموضوع
بقيت بسافر لألف لوحة و انا في مكاني بس الجمال في الموضوع ان بالرغم من كل التداخلات الا ان فيه تناغم غريب و سلاسة
جميلة جدا
بحق فنان
سلام
مها