Wednesday, October 28, 2015

الحرية حلوة وغندورة

الحرية حلوة وغندورة وقعدتها حلوة وخطابها كثير غير المريدين على اختلافاتهم
إنما العدالة يا حول الله يتيمة وعاجزة ومنكسرة

يلزمها سيف

معي عهد وبوصلة

معي عهد وبوصلة وقلم وسيف وحتة من توب قديم وخطة وخريطة ومهام وأتر ولفة حرير فيها كلام رباني
وكرباج اجلدبه الديب جوايا
ومفتاحين للعقل

أو للوحش

اللي بيشكك في نية القوي المناصر للضعيف

اللي بيشكك في نية القوي المناصر للضعيف لمجرد انه قوي، مش بيثبت الا انه هو شخصيا لو حصل وبقى قوي.. مش حيعبر الضعيف.

(كل إناء ينضح بما فيه)

هناك حيث الجانب الخفي من القمر

هناك
حيث الجانب الخفي من القمر
ومثلث برمودا يترصدْ
وقارة غارقة في مياه السنين
وبحر رمال ناعمة يتمددْ
وغابة خانقة ذات شجر متوحشْ
وكائنات تُحَسُّ لا تُرىٓ
ووجع مزمن ينخر في الوجود
هناك حيث الخط الفاصل بين الساعتين
حيث الميت من حي.. والنبع من حجر
مع تلاطم الحلال بالمحرم
وتصادم القبح بالجمال
وفحيح الصمت في صدى الكتمان
قبل انفراج الطلق
وبعد احتراق الأثر
هناك
بين دفء عابر وجليد يمر
بين نصل قاطع وظل جثة
قرب ماء طهور يتحفز..
ودم يصب في دنس
هناك أكون
إذا شئت أن ترى ما رأيت
فاتبع النجم الذي تشك فيه
واستمع للذي لم يقله أحد
وصاحب الذهاب والإياب كالإبل
تجاوز السؤال والجواب كالصقور
اسحب سلاحك المجهول من كتابك الغامض
تأمل المبهم في الخلايا
واقرأ المطموس بين السطور

حصان من نار

حصان من نار
بلون بمبي
وشعر فانوس
ركبته طار
وخلاني أشوف من فوق
وسابني طاووس
وِلِع قلبي من الشهوة
أبوس إيدك هاتيني للحياة مرة

وخليني اشوف تاني

لا يريدونك ان تزرع القمح

لا يريدونك ان تزرع القمح
لذا ستزرعه
لا يريدونك مسلحا
لذا ستتسلح
لا يريدونك مستقلا عادلا بين ابنائك
لذا
ستنتزع الماء والطاقة

وتضبط الإيقاع💪🏿

أناالحفيد جئت من عبث ونشأت في خلل

أناالحفيد جئت من عبث ونشأت في خلل
ذاكرتي مفقودة
ميراثي منهوب
آبائي مطموسون بعدمااستلبوا
سيف جدي خبيئة
على حافةالحياةوالموت أمشي

وأقول مالدي

من هذا الهامش

من هذا الهامش
من أعلى لحظات الضعف
يزحف شعري
جيشاً من نمل في عرش الأمس
من هذا الهمس
تتولد إيقاعات الزمن القادم
من هذا الركن الناعم
أشحذ نصل السيف

وأبايع نفسي

مااتخدعتش عشان غبي

مااتخدعتش عشان غبي او بتحب العبودية
مااتنهبتش عشان ميئوس منك
ولا اتقمعت عشان تستحق الذل
انت بس بلا خبرة
بس انت حجر من هرم محترم

وعالاصل دور

من هنا ورايح مش ححط طاقتي في تبريري

من هنا ورايح مش ححط طاقتي في تبريري، شوفني كما تحس بقلبك وعقلك وضميرك، شغلي اهه، كلامي اهه، مواقفي أهي، واحنا في عصر التوثيق صورة وصوت

وشكرا

والله ما ذل ذو حق

والله ما ذل ذو حق ولو أطبق العالم عليه.. ولا عز ذو باطل ولو طلع من جبينه القمر.
حكمة عربية

تصبحون على خير وسعادة ورضا،أبعد الله عنكم كل حقود

أماالعيل يعمل حكيم

أماالعيل يعمل حكيم والمهاجر يعمل لاجيءوالواطي يعمل اعلامي والفاضي يعمل كتاب والخسيس يعمل بطل والبطل يعمل بلطجي والبلطجي يعمل عبيط

علم عليهم

لما الإرهابي يعمل ضحية

لما الإرهابي يعمل ضحية والمستبد يعمل مصلح والمصلحجي يعمل مصدقهم والمستعمر يعمل متعاطف والصايع يعمل ثورجي

اعمل انت الصح واقلب الصفحة عالكل💪🏿

فده عاوز يسحبك وراه أو يتهمك بالكفر

فده عاوز يسحبك وراه أو يتهمك بالكفر
وده يسحبك او تبقى مش وطني
وده يجرك للتحرر وده يزقك لمنحدر الصعود او منزلق الأمركة
وكل دول بيهتفوا حرية😂😅

خالد!سمعت الندا

خالد!سمعت الندا وانا لسه في العشرين
خضت الشباب معركة مصروفلي فيه دراعين
الله على حكمتك!وانا آجي فيها فين؟
حوشتلي برحمتك أحلى الحاجات..بعدين

كنّا سنة ٦٩

كنّا سنة ٦٩ ونكسة واستنزاف وبلدنا عالترعة بتغسل شعرها الخ
طب ازاي حتاخده يحارب ولما يروح لو روح ترميه في قبو؟؟
بس

كنت ابن ٦

كنت ابن ٦
لعبنا عند بيت جدي وعالمغرب مروحين من نفس الباب
عالسلم شفت قبو لامم ولاد البوابين! اندهشت!
صحابي ليه؟
ابدا ده بيتهم!
فوقع النظام

استثمارا للغزالة الرايقة

استثمارا للغزالة الرايقة ومن قلبي بنصح أي حد بيكرهني وبلا سب اهه:
انا بطلع أعلن رأيي ومش بطول الا لما تستفزني فبلم الخلق عليك
ما تطنشني😆

وشك

تحيا الأماني

تحيا الأماني
تحيا القوة
تحيا الحياة
الصاوي اتجنن😂 معلش أصلي بقالي ساعة بتخانق مع أصوات الاحباط واشباح الهزيمة وظلال الخوف
وحسمتها

وبحبكم😋

من حقك تحلم بسلمية

من حقك تحلم بسلمية سلمية لحد ما تصحى على ضربك من كذا جهة كلهم مسلحين، بس انا لا، وحاخد اخوك وابنك في صف القوة، وحنلوش لحد ما ننتزع حق عيالنا

انا بعلن خروجي من المصطلحات القديمة المنعزلة

انا بعلن خروجي من المصطلحات القديمة المنعزلة
انا عاوز حاجتين سوا كوجهي عملة فعلا:
استقلال وطني/عدل اجتماعي

دي معركة مع برة ودي مع دلاديل برة

الست شهوة سعيد شبق

الست شهوة سعيد شبق
جوة القفص متكلبشة
في وشها كحل وعتب
واحمر ومحن وجوع وفرحة
وتحتهم مطمور خزين
ذل وغضب
متحوشين
راقات راقات
وجع السنين اللي انقضت
بين المطاردة والمناطحة
واقفين لها بالرشاشات متوترين
فرق المكافحة
وعلى اللاسلكي القناصين
بيخلوا سكان السطوح
والكل يشخط في العيال
والغية بتهش الحمام
ويطير ورا السرب الغسيل
وكله تحت السيطرة

والسيطرة فوق الجميع

قصة حياة

قصة حياة
فاكر زمان
فرح غريب وضرب نار مليان وفطش
كان قبلها موسم قلق ماوعاش عليه
ولو وعيت مافهمش
كان كله سايح
وكنت حاسس بالخطر
بين الصدى والصمت صوت لكنه رايح
وكل يوم تطلع لفايف شوك
وكل ساعة يموت شجر
الموت يعدي عالحياة يرمي السلام
ساعات ترد وتتقي شره البعيد
وساعات ترد الباب في وشه بدون كلام
وساعات تقابله بحضنها الدافي الوسيد
زي الوسادة النائمة حلمانة بيه
واستنته زي العروسة وأهلها عند المزين
تعبت يا روحي وغفلت صحيت عليه
فض الفرح وفضها ولابس حنيّن!
صباحية ضرب وسب ملة في الإعادة
شامم طبيخها كأنه شاكك سممتله
وكل ما احتملت تمادى!
وصحينا يوم عالموت بينزف
كان مستهين بيها عشان سكتتله
خد ديله بين رجليه وقلع واحنا نضحك
من يومها صار للحلوة دار

وهو غار!

الدنيا فيها من البدع أربع فصول

الدنيا فيها من البدع أربع فصول
شوف المدار شوف التحول والحُلول
ييجي الشتا ف معاده يرمي المشكلة
ييجي الربيع ف معاده وياه الحِلول
والصيف ده ماشي بشعلته لابس خفيف
يكسر عليه ويعفر الدنيا الخريف
وادي الحياة يوم بعد ليل شادر فرح

مهما يهاجمها الموت بقفطانه المخيف

حبة زعل

حبة زعل
أخد القفا من فوق ما بصش
لكن زعل
وزعلته كبرت عليه
وعالمبرر اللي قاله بطرف مخه
وعن السبب وان كان غموضه ريحه
وعن المساحة الفاضية بينه وبينه
والهيكل المقلوب في حادثة من زمان
مرمي على ناصية ضميره
لا زعل!
هو كواحد كان لا له ولا كان عليه
هو كواخد كف سُقع
غلي ما فارش على الشبح
كتم في قلبه (قلبه قال) كتم في عبه
في كوز صفيح بيملا منه طمع وذل
وبعد ساعة اثنين ثلاثة كتم كتم
بيسخن الكوز المصدي ويحرقه
يرشه عالبيت والعيال
وأم العيال تاخد قفا
يسب مية ملة لحظه ولزمانه
ويخش أوضته وقبله داخلة البرطمة
يرمي على والديه السبب
مش كان زمانه؟!
يحس حد بيسمعه منهم
مع انهم مالمرحومين
يكتم يكاد يزرق يرزع بابه خايف
ويخاف ليعرف أهل بيته السر من ثلاثين سنة
خوفه من الأبواب ومالاقفال ومالضلمة ومن أمه وابوه
وخوفه لو ياخد قفا

يبص له!

لو مت فورا فعالاقل ميت صريح

لو مت فورا فعالاقل ميت صريح ورأيي من قلبي ولوعملت من جثتي المعيوبة طريق للي نفسهم يمشوا بلا عيوب حطمن

وسايب كلام مش عظيم بس يوجع، مر بس حر.

ارتكبت في نص قرن طن أخطا

ارتكبت في نص قرن طن أخطاء، بس ما قطعتش الوصلة مع الحق والخير والجمال، أغلط واعترف واعتذر، ثم اصلح، ثم أغلط
المهم أكون مقتنع مش مسحوب في قطيع



لا أخشى السحر ولا الساحر

لا أخشى السحر ولا الساحر، سحرهم سينقلب عليهم، والإناء سينضح بسمهم، وبما فعلوا يندمون
ما أخشاه هو أننا سنشهد سحق من افترى بقلوب لم تعد تتعاطف

الأستاذ جمال الغيطاني

كما كان ذكرك يملؤه
اذكريه
وضمن أعظم فرسانك المتيّمين بك..شيدي هرمه واكتبي:
في ذمة الله
المُعلم البار والمبدع المخلص

الأستاذ جمال الغيطاني🌴🌴

مجنون يا عالي

مجنون يا عالي فين تروح وتخوض؟
مجنون! مصيرك من حضيض.. لحضيض
مع كل دقة بتنتفض حتطير
تفرد بساطك.. تسحبه الصفافير
ممنوع تغادر زنزانات صدري
ممنوع تهاجر للبراح والضي
خايف عليك إنك تعيشها مريض
نابض ورافض كل شيء مفروض
لكني خايف موت لييجي اليوم..
تعقل وتتقل.. ينجح الترويض

اوعى تخاف

اوعى تخاف
إياك تعوز
حتخاف..حتموت
حتعوز..حتبوظ
خليك فوق
فوق الجوز
فوق نفسك
فوق العمر
والموت
اوعى
إياك
خدها فصدرك
كتم على سرك
..

وارشق كالسهم