Tuesday, April 16, 2013

مالشمس، مالنيل، مالخَضار، مالهرم

مالشمس، مالنيل، مالخَضار، مالهرم
من زعقة الأجداد ف وش الصحاري
من المصارعة مع الفناء
ومن المنازعة مع الضواري
من قرص رع، من رجل حابي
ومن براح أوزير ونخوة حور وإبداع الحواري
من عِزوة الآثارات ونقش الفلاحين
مالوشم الاخضر والبصل والثوم وريحة الخبيز
وزمزمية عسكري عالحدود، ورسم العاشقين عالشجر
ومن عذاب في الغربة زي العبيد
ومن المهانة على جواز السفر
ومن لذاذة ضحكتِك ويا الغروب
ومن نحيب الناي على الترعة
ومن المياصة اللي ف غناكي، ودقة الدربُكّة
من طول حبالك، ومن روقان بالك، ومن صومك طَوال الدهر، مالبُكّ القديم، ولون لحم الهوانم، ومالكحل اللي يحرق، وشكشكة العروسة عشان تشيل البلا، وإيد عجوزة بترقي واد بيموت، وجواب طويل للست أم العواجز، وشكوى مالمعاميع لسيدنا الحسين، ومن ظهور العدرا فوق مصر القديمة، ومن شموخ مارجرجس.. وسلطنة ثومة
من كل ده ودي ودول حعجن ملامحي ف كفك المشقوق
واعصر خلايا العصب شراب برقوق
واحفر بدمي غنوتك عالحيطان، ومدرجات الملاعب، وشقوق محطة مصر
وانقش قصايد حبنا جرافيك
واقف بقوة ربك المتعال قصاد جميع الجيوش
وانخز بمسماري العروش
واغرز في لحمي كلمتين:
أنا مش بحبك.. أنا مريض بيكي
وانزف واقول: مانتيش وطن، ولا علم ونشيد، ولا خيال ولا حلم، ولا أراضي وناس، ولا بلاد وخلاص
انت اللي مني ومن دمك أنا والناس
وانت الرسالة اللي ف شعاع الزمن
والحمل في رحم الوجود

5 comments:

ياسمين حميد said...

الله عليك!

معلومات و حقائق غريبة said...

رائع يا فنان

Anonymous said...


من كل ده ودي ودول حعجن ملامحي ف كفك المشقوق


واحفر بدمي غنوتك عالحيطان، ومدرجات الملاعب، وشقوق محطة مصر

وانقش قصايد حبنا جرافيك


وانخز بمسماري العروش

واغرز في لحمي كلمتين:

أنا مش بحبك.. أنا مريض بيكي

وانزف واقول: مانتيش وطن، ولا علم ونشيد، ولا خيال ولا حلم، ولا أراضي وناس، ولا بلاد وخلاص

انت اللي مني ومن دمك أنا والناس

وانت الرسالة اللي ف شعاع الزمن

والحمل في رحم الوجود

يا جمال صورك
الله جميلة وحقيقية وموجعة
وحشتنا قلمك يا ريس
ساره

Anonymous said...

الله ...نفسي اسمعها بصوتك

Anonymous said...

المسلسل كان تحفه بس محستكش طبيعي زي عادتك في حاجه مش مربوطه فيك .. روحك مشتته شويه ده طبعا بعيد عن الاداء .. اداءك كان جميل بس ناقصه حاجه !! تقريبا توحد جسمك بروحك زي ما تكون موجود و مش موجود في حاجه مش واضحه مش قادره افهمها هي ايه بالظبط بس في العموم كان جميل :) مبروك