Saturday, October 28, 2006

مواجهة السعار الجنسي

وماذا كنا ننتظر من سنوات تتم فيها تربية الانسان كالحيوان في البيت والمدرسة والجامعة والورشة والجيش والقسم والمصلحة الحكومية والشارع؟؟ماذا كنا ننتظر من نفاق اجتماعي سافل ينخر في عظامنا نخرا وادعاء مكشوف للتدين عمال على بطال بداعي وبدون داعي حتى صار الدين سلعة وصرت تحج بزيرو تسعمية؟!!وماذا كنا ننتظر من علاقات رديئة بين الجنسين يتم تشويهها يوميا من التلفزيون والجريدة والمجلة وأفكار الأهالي وحيل الصبيان على البنات والحيل المضادة وبيع الجسد ماديا وافتراضيا وعلاقات زوجية مشوهة تحكمها المصلحة وتتربى فيها أجيال لا ترى إلا حيوان هو الأب ينكح وينهر حيوانة هي الأم على مرأى ومسمع من حيوانات المجتمع والدولة؟ماذا كنا ننتظر الا أن تتحول الحيوانية والجبن والنفاق والغضب والأحقاد المتنوعة الى كيان مادي ملموس يأكل ما تبقى من نتف حضارية مزيفة عاهرة وقيم مبتذلة قوادة..ماذا غير هذا يمكن أن يحدث في محيط استبد به الجنون وتعمقت الفوضى وتحرش الضياع بالنفوس فخربت الأرواح والذمم؟أترك لزملائي الأفاضل مهمة البحث والتنقيب عما أوصلنا الى هذه الهاوية السحيقة وكلي ثقة في قدراتهم التحليلية على خلق سد ثقافي منيع في الغد القريب.. أما أنا فأرفع العصا وأتجاهل للأسف الشديد كل من يقدس "كل الشعب" تقديسا مطلقا مبررا للحيوان منه حيوانيته وللغلاظ غلظتهم.. أرفع العصا عاليا وأدعو لتشكيل كتائب الشوارع من الشباب القادر على القتال للمواجهة الفورية مع هذه الظاهرة بالتحديد.. نريد حماية شعبية تجد مبررها في هول الحدث نفسه.. وهل علاج العنف بالعنف مفيد؟ أحيانا طبعا.. حينما تملكت العصابات القذرة في نيويورك من رقاب الشوارع نهض لهم من سموا أنفسهم "ملائكة الشوارع" وهم شباب يتولون حماية الشوارع من العصابات طالما انه لا أمن ولا أمان .. هنا يحق القول فلا يفل الحديد الا الحديد ولا يفلق الحجر الا الفأس.. هذا الشارع الرخو الدنس يحتاج الى حزم لا نراه وحسم لا نعرفه وسيأتي من يفعل ذلك من اليسار او من اليمين فلنكن نحن جنوده. ارفع العصا وحطم عظام المتوحشين بنا.. يريدون ان يختصروا المسار الصعب لتغيير واقعهم الرديء.. يريدون ان يقفزوا على المواجهة المضنية مع مشاكلهم.. ان يفوزوا بقنص سهل في غيبة من السلطة واحتضار للكيان الاجتماعي الكبير.. بكل ما في قلوبنا من تفهم للدوافع والبواعث والأسباب وبكل ما في قلوبنا من حب للبشرية بجهلها وضياعها سوف نرفع العصا على هؤلاء قبل أن تتعرض النساء لضغوط مضاعفة من أهاليهم أصلا خوفا عليهن من ملاقاة التوحش في الشارع.. وقبل أن ينعم السلوك الهمجي بمشروعية خفية على الطريقة المصرية المنحطة أحيانا.. أبكي على ضياع هؤلاء الشباب وأنفطر حزنا على عظامهم التي ستتكسر ولكن حزني على ابتذال "نصف المجتمع" لهذه الدرجة أكبر بكثير، وغضبي فادح على النخوة المهدرة في رجالنا.. وشكرا لرجال الأمن الذين تمكنوا من صيانة أمن السلطة وتدشين هيبة الأقسام وإعلاء سطوة كروت التوصية على حساب أبسط مفردات العمران البشري الحضاري.. كرامة الجسد.. نعم هم شباب مقموع مكبوت مغدور في حياته من أولها لآخرها ولكن ومع كل تفهمنا لجذور أمراضه سوف نرفع العصا حيث لا ينفع وعظ ولا إرشاد.. وحتى يأتي يوم يدرك فيه المقموعون جميعا أن الحل في احترامهم لكرامتهم جميعا وليس في نقل الانتهاك الواقع عليهم الى مظلومين آخرين. فلنقطع عليهم هذه الفنتازيا المخدرة التي تهيء لهم أن القنص السريع ممكن وممتع .. يريدون أن ينكحوا كما يهتفون.. هكذا ببساطة !! وبهذه الكيفية.. إنهم يعلنون أنهم ملاك الشارع في عالم تتوجه البلطجة وتنعدم فيه النخوة والكبرياء.. فلنعلن نحن النداء المضاد.. الشارع لنا نحن.. لأولئك الذين يبحثون عن حل صعب المراس من أجل غد قريب كما نأمل تنمو فيه العلاقات بين البشر في حرية ونظافة وكرامة.. الشارع لنا وسنرفع فيه رايتنا.. بالحسم لا بالتراخي وبالشدة بمنتهى الشدة علها تكون بداية لإيجابية غائبة وتماسك جماعي على شيء محدد لا يحتمل التسويف.

27 comments:

Anonymous said...

بالرغم من اللي قلتله صحيح و اتفق معاك فيه لدرجة كبيرة. الا ان فكرة (رفع العصا) حتأكد في نفسنا و في نفس الشباب دول انهم فعلا حيوانات. صحيح احنا محتاجين القوة لان للاسف ممنوع حتي علي الامن حاليا حمايتنا. لكن لازم قبل رفع العصا نبقي عارفين انهم بشر مريض نفسيا. نحاول نكلمهم قبل ما نهددهم، والا تحولنا احنا كمان لحيوانات مسعورة بتجري ورا الانتقام و لذته.

Anonymous said...

معلهش انا اسفه على ردى ده بس انا حاسه ان الانسه قاعده بتعمل مانكير و بتقول رايها بالمره اسفه كمان مره بس هى لو كانت هناك مكانش ده هيكون رايها خالص يمكن كانت حكمت عليهم بالموت ضربا باالاحذيه او بالبلطه او ب اى حاجه تانيه اكثر قساوه او اهانه

Anonymous said...

ايه ده باين عليك هتنضم لثلاثين فبراير

اقرأ
http://www.manalaa.net/cut_their_fucking_balls

Anonymous said...

يابنات الموضوع بجد مهم جدا وجارح لأبعد حد
لحد امتى هاندارى عنينا ونقول مافيش حاجه
إذا كان خلاص حاميها بقى حراميها
والديابه بقت هى حارس المزرعه
مادام مش لاقيين حد يدافع عننا يبقى لازم ندافع عن نفسنا
مش مجرد اننا نسيل سلاح ونهاجم ونستعمل العنف وبس
لأ.. احنا كمان لازم نعرف ازاى نعلم الأجيال الجديده انها تدافع عن نفسها وتواجه وتقدر تحافظ على كرامتها
دى بقت بلد يتخاف فيها على الولد زى البنت

^ H@fSS@^ said...

حسبي الله و نعم الوكيل اولا

ثانيا الحالة دي حدثت لاسباب كتيرة محتاجالها بلوج لوحدة
للاسف يا ايمي بالفعل العصا مهمة في وقت زي ده
الحكومة قبضتها محكمة لكن عالناس اللي غلط فبالتالي بدت نوعيةاخري من الناس من استمداد اي نوع من انواع القوة بالشكل ده
و لكن احب اوضح حته صغيرة
حنمسكلهم العصاية للتاديب ولكن لازم برضة نساعدهم علي التقويم و
الجماعة اللي عملت الكلام ده في نص البلد كانوة مين؟؟
ناس لا تعيش تحت ادني خط من الظروف الادمية اللي ممكن تتهيأ لاي انسان

عايشين في عشوائيات لا يعلم بها الا الشيطان
المصيبة ان دلوقتي الشكل العام بيقول ان الحكومة طبعا و كالعادة مالهاش دعوة
اذن اضم صوتي للاستاذ خالد و اقول لازم نحمي نفسنا بنفسنا
ما هو خلاص سقط كل شئ

و اللي احب ابشركم بيه و لو انه يبان بعيد شوية
دي بداية سقوط دولة القرامطة :)
يعني بكده يكون رسميا اتدق اول مسمار في نعش اللانظام المتاصل
معلش خدوا بالكوا الخلاص لا ياتي في علب شيكولاته فاخرة
فتوقعوا المزيد و عبال ما المزيد ده يحصل ان شاء الله اكون بقيت معاكو ليحق عليا الخلاص انا كمان
لاني مش بحب اتلكم كتير و معملش حاجة
دي بدايات النهاية يا حلوين
تحياتي

الخبز و الحرية said...

علاء رحت ملقيتش اللي بتشاورلي عليه ممكن توضح اكثر لو سمحت؟
حفصة عاوز اشاور على حاجة.. طبعا فيه ظروف نيلة خرج منها اجيال منيلة لكن المهم بقى هي لحظة السيكوباتية الجماعية أو العدوانية الجماعية اللي ممكن تبقى بتنده حتى اللي مش خارج من عشوائيات ولا دياولو.. هي لحظة فككان كده بتطمع القطيع وتطلع اوسخ ما فيه.. يطلع بقى عنف او هياج جنسي او عدوانية سلبية او او.. اللحظة دي هي اللي عاوزين ندمرها بالاساس عشان السبب ده بالضبط وهو انها لحظة بتطمع الكثيرين بغض النظر عن تفاوت درجة معاناتهم في الواقع من الضغط الذي يولد هذا الانفجار.. هناك عدة رسائل في تلك اللحظة.. مزيج من استطعام الخسة والقنص المحرم واثبات الذات المنسحقة اصلا لسبب او لآخر مع التعويض والانتقام والتحدي العام و و و يعني هنا يعرف النفر انه يخترق حاجز الحضارة نكوصا لمراحل وحشية.. هنا يجب ان يجد ضمير جمعي عنيف في مواجهته هذا رأيي

الخبز و الحرية said...

فدوى مش فاهمك خالص للأسف وضحي.
سيزر ضحكتني وشر البلية ما يضحك يا رجل:) لا طبعا مش موافق على الاخصاء مقابل التحرش ، مجرد شايف انه ينفع عقاب لجريمة ثانية هي الاغتصاب وبالذات اغتصاب القصر. لكن شايف ان تكسير العظام عقاب معقول خصوصا على طريقة جوالة الشوارع او على نهج الفتونة الأصلية يعني.. من شباب الحي دفاعا عن بنات الحي ومن شباب وسط البلد دفاعا عن وسط البلد وهكذا.. المواجهة الفورية هنا لتحطيم نفسية القطيع وصدم الذات المنحطة بدفاعات الضمير الجمعي المتشددة ستحيي في الشارع كله معنى الحضور الاجتماعي الذي هو غائب نتيجة لقمع من أعلى وسلبية من أسفل..الرسالة هنا "لو تعاملت كحيوان فسوف تعامل كحيوان" وده المهم في رأيي مش الانتقام منهم.. اما في الاغتصاب وبالذات للقصر فانا مع اخصاء المجرم طبعا لأن الرسالة هنا دالة جدا.. "لو غرتك ذكورتك على انتهاك الأضعف فستفقدها للأبد".. وانا الحقيقة دلوقتي في حالة غضب تخليني اوافق على الكرسي الكهربائي والسيخ المحمي وكده حتى لو بعد ما اهدى حبقى احكم عقلي اكثر بس دلوقتي انا غااااااااااااااااضب جدا

albida said...

أهلا يا جماعة
معلش ممكن تسمعونى شوية.... لأنى كنت هناك يوميها فعلا وشفت كل حاجة بنفسى

طبعا فكرة الخروج يوم العيد فى وسط البلد دى كانت فكرة فاشلة... مش عارفة ايه اللى هبشنى فى دماغى وخلانى أنزل مع بابا يوميها... ما علينا, أهو حصل وخلاص
الدنيا أولا كانت زحمة موت بطريقة ماتتخيلوهاش, فانا قلت لبابا يالا نمشى! كنا فى شارع سليمان باشا ساعتها, والأضل أن كان فيه بوليس فى الشارع علشان كان فى عرض خاص لاحد الأفلام... و البوليس بقى كان بيعمل ايه؟ كان ماسكين احزمة وحاجات عاملة زى الخراطيم السودا وبيضربوا بيها الناس اللى تقرب من السينما!! فجأة لقيتلكوا مجموعة كبيرة من الشباب بيجروا وقاعدين ويقولوا فى بنت(مذة) فى اخر الشارع! والله أنا استغربت جدا... يعنى فيها ايه لما يكون فى بنت حلوة فى اخر الشارع؟! بابا سألنى ايه اللى بيحصل قلتله يالا نمشى علشان أنا ابتديت أحس بمصيبة جاية.. وبعد كده سمعت بنات قاعدة تشتم وتصوت

تخيلوا واحنا بنعدى الشارع لقيت شاب لزق فيا من ورا وحاول يقل ادبه, المهم انا اديته كوع فى بطنه تقريبا فجرتله القاولون :)
المهم... روحت البيت وانا بجد حزينة على حالنا

بالنسبة للحل.. العنف ممكن ينفع بس ده حل قصير الأمد... يعنى بنفض بيه مجلس وخلاص, لأن ايه يضمنلنا أن ملايكة الشوارع دول مش هيعملوا نفس اللى كان الناس التانيين بيعملوه
لازم برضه نفكر فى النصح والارشاد ونهتم بالجيل اللى جاى كويس جدا.. علشان لو واحد ضاع يبقى التانى فيه أمل

وحكومة ايه دى بقى ان شاء الله اللى أحنا نعتمد عليها ونشتكيلها؟
أنا عن نفسى بعدى قدام وزارة الداخلية كل يوم فى الرايحة والجاية.. وعايزة أقولكم انى بسمع كلام ومعاكسات فى منتهى قلة الأدب والسفالة من عساكر وظباط الأمن المركزى لدرجة انى بقيت أدور على شوارع جانبية اروح منها
يعنى دول اللى مفروض يحمونى ويدافعوا عنى... يا فرحتى فعلا!

العنف مش هو الحل الوحيد لانه زى ماقلت حل قصير المدى ومش هيولد غير العنف

أنا اسفة طولت عليكوا... وربنا يستر علينا كلنا


manal

Anonymous said...

يا عم خالد سبتلك كومنت في التدوينة اللي فوق بس لما قريت تاني زعلت منك وحطيت في نفسي
"وأدعو لتشكيل كتائب الشوارع من (الشباب) القادر على القتال للمواجهة الفورية مع هذه الظاهرة بالتحديد.."
دا علي أساس ان احنا مكسورين الجناح اللي محتاجين الشباب يتنفضوا دفاعا عن أعراضنا المنتهكة،لأ معلش يا خالد فينا بنات تقدر تعمل دا احنا مش ناقصين ايد ولا رجل ولا احنا لامؤاخذة قوارير. . .
البنات لازم تبقي مع الولاد كتف بكتف بدا ولازم يتعودوا من هنا ورايح يدافعوا عن نفسهم. . .
و من هنا أدعو علاء و 30 فبراير الي تبني حملة لتثقيف البنات بالطرق الممكنة للدفاع عن النفس الدفاع عن نفسهم وأنا عارفه ان دا ممكن. .

حدوته مصرية said...

انا معاك يا خالد هما لازم نشوفلهم حل بس مين اللى هيرفع العصا ولا هيضرب
انتى يعنى هتنزل تعمل حاجة؟؟
و بعدين الضرب مش حل هيضربوا وبعدين هيرجعوا تانى لانه مش حل

Amr Ahmed said...

هاي خالد شكرا علي الموضوع لكن العصيان بتترفع بس علي المتظاهرين بتوع كفاية بس دلوقتي ما بقتش كفاية بقت كفاية حراااااااااااااااااام لان اللي بيحصل لنا ده حرام لو حد عنده حل ياريت يقوله
ياريت يا صاوي اسمع رايك في مدونتي شرفني

karakib said...

كل جيل يحصد ما زرعه من قبله ... اؤمن بشده بهذه العباره و الان جاء وقت حصاد الاشواك ...
انتوك

Nohaz said...

معلش مش لاحقة اقراء كله انت عارف الظروف بقي يا حاج
يا رب السمة الجاية انا و انت و ناس حلوين نزور بيت الله
...
عايزة بس افكرك بحاجة
الموضوع ده كل عيد .. انا مش بنزل اساسا في العيد... غير كده انت ناسي حادثة فتاة العتبة في اتوبيس و نهار رمضان؟؟؟ سنة 92 و كان في وسط اتوبيس في العتبة
عايز اية تاني؟؟
الموضوع قديم
موجود بس قديم مش طلع النهاردة
فجأة كلكم حسستوني انه جديد
كأن ولا بنت اتعرضت لمضايقات قبل كده و في اي وقت و من اكتر من 10 و 15 سنة

دعواتك بتوصل ... استمر في الدعاء ...انا مبسوطة قوي
أختك نهي

Anonymous said...

مرحبا بالجميع ..
مرحبا أستاذ خالد ..
كنت أقرا على النت بعض الموضوعات المتعلقة بهذا الحادث و قادتنى أحد الوصلات إلى مدونة حضرتك و قد سعدت جدا بهذا ..
و أجدها فرصة لكى أهنىء حضرتك على الدور الأكثر من رائع فى فيلم عمارة يعقوبيان .. خصوصا مشهد صور الأب و الأم .. لقد دمعت عيون الجميع .. هو فعلا من أروع المشاهد التى رأيتها فى حياتى ..
أعتذر عن الرد خارج سياق الموضوع لكن لم أجد اى قسم فى المدونة يتحدث عن الفيلم
مع خالص تحياتى و تقديرى
أوفيليا ....

الخبز و الحرية said...

والنبي يا جماعة محدش يحط كلام في بقي ويرد على نفسه.. انا لا قلت العنف حل وحيد ولا قلت ان البنات مش حيدافعوا عن نفسهم وقلت الشباب وانا في ذهني الشباب مش الصبيان والبنات.. اما مين اللي حيمسك العصا فده سؤال مش فاهمه الحقيقة.. بنقول نواجه الظاهرة الهمجية دي بتكوين ضمير جمعي صلب وظاهر يفيق الشارع المصري الى انه الشارع لنا نحن المواطنين المحترمين المسالمين اصلا مش للسلوك الهمجي وده لا معناه بننتقم من حد ولا حاجة.. احنا بنمنع الفككان الاخطر القادم.. انا فاكر لما كنت في سن 15 سنة سرقت عربية ابويا وسهرت مع شلة صحاب في الشارع نسكر ونولع نار ورمينا طوب على البوكس اللي معدي.. وجه ابويا وسفخني قلم فوقني وصحى ضميري اللي كان مرحرح ساعتها زي ضمائر الشباب دول.. فاكر القلم ده كويس لأني عمري ما كررتها تاني بعدها وفضلت احب ابويا جدا جدا لأنه فكرني لحظتها اني بني آدم وراجل ومايصحش اعمل كده.. ساعات لما يحصل انفلات بيكون ده الحل او جزء من الحل على الاصح.. وتاني بقول اللي عاوز يتكلم في الموضوع ده ورجليه في مية باردة عليه ان يفكر لو ده حصل لأمه أو لأي ست هو بيحترمها اصلا.. حيعمل ايه؟ ايه المشكلة في تنظيم نفسنا للدفاع عن نفسنا؟ خايفين لا نعمل الوحش اللي ياكلنا؟ طيب بلاش.. عاوزين نشوف الشطارة في النصح والارشاد .. سمسمة.. ابقي اقري كلامي كويس قبل ما تتطوعي بتصنيفي الله يخليكي.. انا بلعب ايكيدو وعارف كويس ان البنات ممكن تدافع عن نفسها ولو عاوزة تعرفي ازاي ابقى ابعتلك اللينكات.
حد يعرف ازاي اسكت اللي بيحدف اعلان كل شوية ده؟

حاجات ومحتاجات said...

مساء الخير اولا يا استاذ خالد :)
انا صعقت بصراحة لما قرات عن احداث اليوم دة وحسيت ان في مبالغات كتير في سرد اللي حصل فيا ريت اولا اللي كان موجود يقول لنا هل اللي مكتوب في معظم المدونات صحيح ولا في شوية تهويل؟
تقدري تقولي لنا يا Albida؟

لو اللي حصل هو اللي مكتوب فعلا في المدونات فدي حاجة في منتهى القرف بصراحة.الشباب اللي عمل كدة اكيد كلاب ووحشين وشريرين وكل حاجة لكن كونهم مش خايفين من العساكر اللي كانوا متواجدين في المكان فدي حاجة مذهلة فعلا! ومش عارفة هل دة بيثبت ان الحكومة بكل افرادها اصبحت غير قادرة للدرجة دي انها تحافظ على الامان؟ الناس مبقاش فارق معاها وجود الامن لية؟ والعساكر اللي واقفين عشان عرض خاص!!! دة اية الهطل دة!
احسن حاجة يا بنات ان كل واحد يحمي نفسة بنفسة بما اننا عايشين في غابة. المكان اللي فية زحام ببساطة ميتراحش! وكل واحدة تروح تتعلم كاراتية ولا تايكوندو ولا كيكبوكسينج ولا اي حاجة تعرف تدافع بيها عن نفسها دي بقت حاجة قرف!

albida said...

حاجات ومحتجات.... أنا كنت موجودة ساعتها فى وسط البلد وشفت الموضوع ابتدى ازاى... لكن ايه اللى حصل بالظبط أنا معرفش

اللى أقدر اكدلك عليه ان الموضوع كان منتشر... يعنى مش فى حتة واحدة! الشباب مرة واحدة كده جاله لوسة وبقى يضيقوا البنات اللى ماشيين لوحدهم, وبيقولوا كلام مش محترم

أما عن البوليس فهو مكانش فاضى, كان مشغول بالعرض الخاص

أستاذ خالد... حضرتك فهمتنى غلط
أنا مش ضد العنف لكن فى نفس الوقت مش معه كليا
احنا اتعلمنا ان لكل فعل ردة فعل
وانا عن نفسى استخدمته- حضرتك لو راجعت البوست اللى فات بتاعى-لكن وبعدين؟
هو اه هيفوق الشباب... لكن لازم نكلمهم ونقلهم ليه هم عملوا كده وليه احنا عملنا كده

أنا متأكدة ان حضرتك مش مع العنف تماما, لكنك غاضب! وده حقك كانسان وانا كمان كنت هافرقع لما الولد ده حاول يضايقنى... علشان كده رديت عليه بالعنف

أحنا متفقين فى وجهة النظر, ولكن تنفيذ الحلول هو اللى بنختلف فيه, وده شئ كويس لانه هينتجلنا فى الاخر اكتر من حل
كون ان احنا مش مع بعض مش معناه ان احنا ضد بعض
:)


manal

albida said...

وبالنسبة للى بيحدف اعلان كل شوية ده... أعمل ديليت للبوست وريح دماغ حضرتك
:)

الخبز و الحرية said...

فدوى منفضلك كثفي كلامك واسألي سؤال مباشر وواضح عشان تهت منك معلش.
منال.. انا حاسس انك متورطة في الدفاع عن شيء ماختبرتيش صحته تماما.. قوليلي كده اقتراحاتك بوضوح في موضوع العيد.. يعني في العيد الكبير غير انك حتقرري متنزليش وسط البلد.. ايه اقتراحاتك العملية تجاه قطعان من الشباب بتجري ورا البنات وتنتهكها؟ ولو عندك حاجة تتعمل من دلوقتي لوقتها يبقى نسمع يا ريت
فدوى لو فيه اي قالب تحطي فيه كلامك غير النصيحة اللي بيقولها المدرس للتلامذة فده حيحقق تواصل افضل في رأيي

الخبز و الحرية said...

نفس كلامي لمنال بقوله لايمي.. اقتراحات واضحة يا ريت

Anonymous said...

good god ...you are so right mr.khaled...your suggestion is so realistic ...please accept me as a volunteer in this group for next eid( or whenever needed0
el masry affendi

Anonymous said...

يا استاذ خالد والله العظيم الموضوع مش زى ما الناس فاهماة ومش كبير كدة أصلا
وكمان أحنا بنكبرة زيادة عن اللزوم لما نسمية سعار جنسى والكلام الكبير دة
كل الموضوع أن وسط البلد فى الوقت بتاع العيد دة بتبقى مكتظة بالناس
وفى العيد بيكون دة الملاذ الوحيد بالنسبة للفئة الرديئة من المجتمع
فطبيعى أن دة يحصل يعنى
وبعدين هما ما بيعملوش كدة بداعى التكيف الجنسى أو الاشباع للغريزة اللى جواهم , دة شغل بضينة وهودة الهزار والفسح بالنسبة للناس دى

Anonymous said...

طب ما كل دا مش بيحصل فى العيد لوحده ولا فى الأماكن الزحمه لوحدها
دا بقى شىء زايد عن الحد
ودا مش مجرد هزار ولا نيله.. كل واحد فاكر نفسه راجل , وعاوز يبين نفسه ويضحك هو وأصحابه
أما بقى بالنسبة للعساكر فماحدش يقدر يخاف منهم أصلا
دانا بقيت بخاف من أى حد لابس بدله رسمى.. لأنى من جوايا حاسه ان دا هايؤذينى أكتر من أى مدنى.. ومش هاعرف آخد حقى منه كمان
اذا كان أيام المظاهرات .ز كان كلاب الشرطه هما اللى بيبهدلوا البنات
ازاى ممكن نستنجد بيهم بعد كده.. أو حتى الشباب يخافوا منهم؟؟
متهيألى ان حل الموضوع دا يبقى على محورين
كل واحد وله أهل لازم يربوه .. كل أب لازم يراقب سلوك أولاده
ولحد ما يتعدلوا.ز هاتعلم ازاى أشيل مطواه أحسنلى وأكرملى
ايه اللى هايحصل يعنى.. هايسجنونى؟؟
هايبقى اسمى دافعت عن عرضى وشوهت الحيوان اللى فاكرنى سهله
معلش لو كانت أفكارى متطرفه شويه بس أنا بغلى من جوايا دلوقتى

Anonymous said...

I really like what you wrote about this incident Mr. Khaled, especially because it breaks with the intellectual discourse that either gives excuses to the "hungry" aggressors as they call them, or dwells too long on the role of the state in the degradation of society's ethics. The intellectuals and the left in general in our country suffers a complex of detachement and i think this makes them unable to convey an honest uncompromising social criticism. everything is a conspiracy and the romanticization of "the people" goes with a chauvinistic conviction in the integrity of the Egyptian man! But I am glad that at least such a horrifying incident has pushed people into talking about a typical female grievance in our society, the society that represses the helpless on a daily basis. what happened on 3id el fitr, although is not different from the daily prevalent torture of innocents in police stations, or from the unethical exploitation of the poor, and the endless experiences of rape and abuse that street children go through, the 3id incident has this peculiarity of potentially moving a dormant half of our society (yes.. the women) into demanding to be treated as humans. the hypocrisy that has infiltrated all aspects of our society and has both filled our life with superficial religiosity while at the same time made us as far as one can be from values of equality and justice, this hypocrisy has led many to consider legitimate telling a woman what to wear and how to act. it has become a banality to blame women for the society's contradictions, and to treat them as objects of pleasure. it is time for a real women's movement in egypt. a movement that confronts deep-seated beliefs about the sub-humanity and the incompetence of women. it is time for women in egypt to express themselves on repression and chauvinism and to bring in their own particular experiences as women of egypt.

الخبز و الحرية said...

مساء الفل جميعا..
اولا محدش يزعل مني.. ممكن نتخانق زي اي اخوات لكن مش ممكن نتخاصم ده احنا بيننا عيش وبلوجز:)
فدوى ليه قلتي كده في الآخر؟ بلاش عبط انتي اختي الصغيرة وصاحبة بلوج وتقولي اللي انتي عاوزاه انا بس كنت مخنوق عموما من احداث العيد وسلبية الشارع.. نفس الكلام لسمسمة ومنال واي حد كنت حاد في ردي عليه.
طبعا حزينة بصراحة كلامك هو احسن كلام سمعته لغاية دلوقتي.. حركة نسائية قوية ترد الاعتبار للمرأة المصرية على كل المستويات.. ده الكلام السليم.. طبعا مطلوب من الحركة دي تستفيد من كل الحركات النسائية السابقة من 1919 وللآن عشان مانكررش اخطاء السابقين والسابقات.. حزينة انا معاكي 100%

nour said...

شوف بقى يا فندم..اولا لاحظوا يا جماعة ان فى العيد فى ناس من الاقاليم و الارياف بينزلوا القاهرة و خصوصا وسط البلد الناس دى منظر البنات عندهم فى الارياف مختلف عن القاهرة طريقة اللبس و المشى و الكلام ..حاجات بيشوفوها فى التلفزيون اللى هبلهم زيادة بالارف اللى فى الاغانى و اعلانتها..و الله العظيم اس البلاء الاغانى و دانا و نانا و جاد و ملك و الارف و الابتذال ده..تانى بقولها انا لو فى ايدى اعلن تأميم قنوات الاغانى اعملها و لتذهب الحرية الشخصية و التحضر و العوء ده الى الجحيم..فى حاجات لازم لازم لازم يكون عليها رقابة مش قصدى رقابة يعنى ناس تقرا الجرايد و تشطب على اللى يعجبها و اللى ميعجبهاش لا خالص..الرقابة انواع احنا اللى المفروض نعملها..يعنى رقابة دينية رقابة اخلاقية من الاهل فى البيت الاهل يا جماعة لازم الاهل يربوا و لادهم على ايه الصح و ايه الغلط..انا بحس لما بشوف الناس اللى بتعاكسنى فى الشارع بكلمات و الفاظ خادشة للحياء و ساعات بمد الايد ..ودى مش مرة واحده لا حصلتلى كتير بشكل بقيت امشى فى الشارع فى خط متعرج كأنى فى حد ماسكلى رشاش من فوق بناية لما بشوف كده بقول هو اهلهم رموهم فى الشارع من غير رباية ولا ايه؟الحل التانى بقى المفروض نحسن الذوق العام..يعنى المفروض يبقى فى برامج فى الاذاعة و التليفزيون تعرف الناش بالشعر و الموسيقى و الادب و الفن..تقدملهم الروايات الجديدة اللى بتنزل تقرالهم قصايد شعر مختارة..تتكلم من القلب معاهم كده..مش العوء بتاع برامج الشباب اللى كله استعراض ازياء و مياصه..على فكرة فى واحد ليه فضل كبير على جيلى و هو اللى حسنلى ذوقى و هو اللى خلانا نقرا لطاغور و نتفرج على افلام مختارة و نسمع مزيكا مختارة و راقية الراجل ده هو د.احمد خالد توفيق اللى فى كل رواية مش بس بيكتفى بقصة حلوة ,لا و بيحطلنا فيها نماذج لحاجات راقية و يخلينا ندور عليها زى نظام الدراسة فى امريكا لما بيخليهم هما يبحثوا علشان يقتنعوا و يتعلموا
وفى الخر بنطلع بحاجة نتعلمها و تفكير تانى و اخلاق تانية

Anonymous said...

مساء الخير يا خالد ,أنا قرات المدونة النهاردة بس و كنت قرأت اقتراح في مدونة اخري لمواجهة التحرش ,أي بنت تنزل في العيد ولقيت واحد أو مجموعة بيحولوا انتهاكها تقول و باعلي صوت يسقط حسني مبارك يسقط عميل الصهيونية تلت اربع مرات ح تلاقي علي طول كل الكلاب دول جريوا