Friday, October 27, 2006

أقولك إيه؟؟

أقولك إيه؟
لساني زمبلك ضاعت مفاتيحه على أعتاب بيبان الليل
ومخي مرتخي الأعصاب حمل كفنه على كفيه
ودمي الحامي متجمد، كسرته ف كاس ورجيته
قلبته وريقي كان ناشف وكان بدني قميص محني على كُمّيه
وشديته ما كلمني وجريته وجرجرني
ونمنا عالرصيف ساعة كوانا البرد كان البرد زي النار بيلسعني
أقوم ألقف على بدني
ألاقي الرغبة في نهديكي كيس من دم متحني بُه المقتول وكان بدني
وكان الدم متسرسب ما بين رجليه
أقولك إيه؟

غسلت البنطلون مني لقيت لوني ماعادلوش لون
حلقت الدقن حتى شفت شرخ الحيطة في ضهري
وسرحت البياض في الشعر قام واقع جدار البيت
رأيتني في المرايا بقيت دواير مالصابون والدم جيت أضحك
لقيت خطين من المعجون
سحبت البدلة والمنديل
شعرت بإيد على الرقبة بتخنقني .. كانت إيدي
ف ناحية زرار يبرقلي وناحية بتربط البابيون
لبست الجزمة كات أضيق
وحطيت الحزام عالكرش واتفتّق
ووردة ف عروتي تنطق بلون الجنس في ابريل
وحطيت الطبنجة فوق على قلبي وجيت أنزل
لا كان فيه باب ولا شباك ولا طاقة ولا طرقة
ولا إيدي بقت تطرق وانا بطرق
ولا رجليا شايلاني ولا سامع صراخي بكيت وجيت ألمس مكان فمي
لقيت كمي مفيهش إيدين حاولت انظر لقيت وشي بيتاكل
وراح واكل حبابي عينيه
أقولك إيه؟

أنا شايفك غسلت جسمك الكوكب بلون الزيت
وصار يلمع ويتبخر عليه الميّ
كجسم حصان بيرمح والعرق فضة
وفيه نجمين من الشباك بيختلسوا الدخول بالضيّ
وانا عارف بأن البطة بعد ما تنفض المية حتتمدد على البشكير وتتأمل ضوافرها
وانا حاسّك دهنت القشطة عالخدين ولون أحمر صبغ كتاكيتك العشرين
وبتراهني حتتربى على صدري وبكرة تطير
وشعرك ناعس النظرة على كتفك عشان يسهر
ويسبح في ربوع الليل ويصبح شال على دمي أحن إليه
أقولك إيه؟

صحيت اليوم لقيت اللذة مبتزّة من الضل اللي كان شاهر ف قلبي بلطته ووشه مفيش تقاطيع
مهوش ناسك ولا شيطان ولا ساحر وقام ماسك بطرف القلب واتشمر وراح نازل عليه تقطيع
سكبت السائل البني وفاجئني بملمس نار وريحته بارود
سقط لحمي حتت خضرا لقيت وشك بيتجمع على قدمي يبوس دمي
ويضحك وجهك الدامي بكا ويضيع وانا محني بلملم فيه
أقولك إيه؟

حنتقابل .. إذا يعني حنتقابل
حنشرب؟ إفرضي مثلا
حبوسك؟ ثم إيه يعني؟؟ مهوش فمي ولا خدّك
وحاخدك بين جناحيني واطير فيكي؟
على عيني.. مليش جناحين
وف إيديكي حيطلع لحمي ف إيديكي حيطلع لحمي مش عارف أقول إزاي
بحبك؟ مش أكيد أبدا
يجوز معرفش أقربلك سوا في الضلمة فيه زحمة على سريرنا مابيننا فيه ميتين ميت وألف جريح
ونفسي أبوح بسر الكون أنا عارفه ودافنه بين ركام الكبت والتصريح
وروحي تحوم على جسمك
(بحبك إنهضي يللا وحاوطيني بثوب الوجد فرد حمام على صدري وبيت عالقد نكبر فيه)
أقولك إيه؟؟؟
ضفيرة في الخيال محلولة في شعرك
شريطة حمرا مخمورة على خصرك
قلم أحمر كتبنا بيه على الشجرة .. على شفتيكي يتطوح صباع الروج
(صباع مقطوع! على شفتيكي يتطوح صباع مقطوع!!)
شاورنا بيه وقام طاير
خيالي فين مفاتيحه؟
وفستان روز
وكورة في الشراب الابيض وميت أراجوز
(بحبك إنهضي يللا)
ونضحك كي يعود لحمي
(بحبك إنهضي يللا وحاوطيني)
وابوس أمي .. تودعني بضحكتها على السلم
واقابلك كفي في كفك ونتحنجل
نروح لبعيد بعيد خالص ونفتح قبر أجسامنا
نلاقينا بنتمدد ف سن اليأس امسّ إيديكي لا تخافي وانا جنبك ولا تبكي
(أنا صاحبك وانا حِبِّك)
وازيحنا .. ألقى سر الكون
أنا عارفه .. ودافنه .. من زمان خالص بروحله لما احن إليه
أقولك إيه ؟
أقولك إيه ؟؟

18 comments:

FANCY said...

Hi'

This I cant figure it out what you are writing.
But Hi' anyway

//Fancy

Anonymous said...

اقولك ايه ايه الخيال ده يجنن خلتنى احس انك دخان بيتجمع فى لحظه و يتفتت فى لحظه تانيه ايه الاحساس بالتجانس الغريب ده مع الاشياء مش ممكن الدوبان كانك تذوب مع كل شيى حواليك اقولك ايه عبقرى

Anonymous said...

يا ريت تشرحلى شويه المود الى كتبتها فيه

الخبز و الحرية said...

hi fancy, well u ve reached an egyptian blog where some friends and i discuss my poems and many ideas and issues we all suggest.
im also an actor, thats y we sometimes talk about my work or any other works we think we need to discuss.
u ll find some friends writing in english in this blog, hope u can catch some of what we are talkin about. cheers:)
شفيقة متشكر جدا واحساسك رائع بجد، المود بتاع القصيدة دي غريب زيها:) كانت لحظة تحول في حياتي وانا في سن 24 واقف بين الحاجات كلها في لحظة كده.. اهاجر ولا اقعد؟ محامي ولا فنان؟ اتجوز ولا لسه؟ اخون حبيبتي ولا التزم؟ اتدين ولا الحد؟ اركز مع حياتي الشخصية واعمل فلوس ولا اخش منظمة ثورية في اي بلد حكون فيها؟ ميت سؤال في دماغي ، 2 ستات في لحظة مكعبلة، ووقفة مع النفس وترجي ان اختار ما هو الصحيح بالنسبة لي وما لا اندم عليه بعدها:)
شكرا على حساسيتك وحتابع تعليقاتك عالاشعار.

الخبز و الحرية said...

حاضر يا فدوى بس انا مش دكتور الحقيقة:)

Nohaz said...

منورررررررررررررررررر البلوج سبوت نورك غطي علي الكهربااااااااااااا
بس حرام عليك النضارة مكسورة و انا واحدة عندها استيكماتيزم
قربت احسس علي الشاشة
بس هحاول اقرا علي قدر المستطاع

يا رب تكون دعوتي وصلتك المرة دي دعيتلك كتير قوي والله
أختك نهي

Polka Dotted said...

Pure ابداع

albida said...

????????????????????????????????????????????????

أستاذ خالد.... بجد أول مرة أحس أن أنا حمارة (مش أول مرة أوى يعنى!) لا بجد, المعنى بتاع القصيدة تايه منى خالص مع أنى قراتها تسعتلاف مرة

هو أكيد العيب منى... حد يساعدنى الله يخليكوا... معلش أختكوا فهمها تقيل المرة دى شوية
:) :)

manal

Anonymous said...

مش عارفه أعبر بصراحه لأنى مش ركزت فى المعنى قوى
فيها شىء مش قادره أفهمه
يمكن عشان العدسات لسه جديده وعينى وجعتنى
ويمكن عشان خلاص وقتى خلص ولازم أمشى وإلا هايقفلوا السايبر عليا
أوعدك انى أقراها تانى وهاقولك رأي أوضح من كده
باى مؤقتا

^ H@fSS@^ said...

اقلك اناايه؟؟
الصراحة ده كلام كبير يصعب علي امثالي فهمه علي راي سعيد صالح في العيال كبرت
علي قد ما فيه تفاصيل راسمة صورة حية لاحاسيس و و مواقف لكن مقدرتش اوصل لنهاية
و يمكن هو ده بيت القصيد لان عمر ما العلاقات كانت بسيطة حسبة الرياضة
و لانه في الاخر ده شعر يعني من شعور و مش لازم يكون فيه درس في الاخر او الاول

و يمكن بيعبر عن حالة من التردد انت
مريت بيها؟؟ و اذا ده كان صح يبقي تاني انت عبقري في انك توصل احساسك بالشعور بالضياع و التوهان لان ده شئ وصفه صعب

و يمكن ليها بُعد تاني مش قادرة امشيلة

في حاجات كتير مستخبية
علي قد ما هي بتصرخ من المجاهرة
ممممممممممم
و الله اعلم

albida said...

الحمدلله... يعنى مش أنا بس اللى مافهمتش المرة دى
:)

فعلا القصيدة حلوة وفيها أحاسيس كتيرة بس هى غامضة شوية

حفصوصة عندها حق.. المهم تكتب اللى حضرتك تحس بيه مش اللى أحنا نفهمه

manal

الخبز و الحرية said...

شكرا نهاز وبطابيط وشكر خاص لفدوى:)
منال مقدرش اعمل حاجة الحقيقة!لو حد يتطوع ويشرحلك حيبقى شيء مفيد لينا كلنا لكن انا اشرح حيبقى موضوع رخم قوي مني ومنك بصراحة:) فاهماني؟ يعني حتحول لفزلوك يشرح اعماله وانت حتبقي في موقف المتلقي السلبي تماما..
روماه شكرا جزيلا على الكلام الرقيق ده:) ومن هنا ورايح انت او انتي صاحب (ة) بلوج:) انت انت ولا انتي بقى؟

وينكي يمكن تكوني صغنونة على كلام الكبار اللي في القصيدة فمش عاوزين نخدش براءتك يا بنتي خليكي مش فاهمة احسن اما العدسات فزي الفل ولا تشكي فيهم.. انتبه الدواء فيه سم ناقع:)
يا اسكندراني انا موافق جدا جدا بس ارجوك ارجوك ابعتلي اقتراحاتك على الايميل وواحدة واحدة جدا عشان انا بفهم بطريقة الترماي في موضوع التكنولوجيا.. يعني فهمني زي ما بتفهم ابن اختك كده زي ما نهى عملت معايا الله يكرمها ويسير لها مراكبها قول آمين:)
بالنسبة للشيء اللي جه رمى اعلان وجري فأحب أن أوضح أن الاعلانات اللي من هذا النوع غير مرحب بها هنا اطلاقا.. مفيش اي مانع ان احد ابناء البلوج او انصاره واحبابه يعلن عن سبوبة يكون بيعملها وكلنا لازم نشتري منه لكن جو الندالة بتاع ارمي اعلان واجري ده لااااااااااااا
حفصة انا مستغرب انك "مش فاهمة" ما هي مفيهاش حاجة تتفهم غير اللي اتقال فيها.. حسيتي بايه بقى؟ هو ده الموضوع.. انا حسيت كده بالمللي لحظتها وكتبتها كلها في قعدة واحدة قصيرة جدا وكنت متوتر وباكل السجاير وده مش دايما بيحصل طبعا.. هل حسيتي بكده؟ انا اثق في احساسك.. اللي بيبقى مضلل يا جماعة ساعات في رأيي هو اننا احيانا بندور في القصيدة على القصة.. بس ساعات الفيلم بيكون مناظر مش قصة بالضرورة:)
والله وحشتوني جدا كلكم

Anonymous said...

والله انا هاقولك اللى حسيت بيه .. بس من غير تريقه
حسيت بجو من التردد.. والقلق
عاوز تعمل حاجه ومش عاوز
بتفكر وبتمنع نفسك من التفكير
بتحب ومش عارف اذا كان دا صح ولا غلط
مش عارفه بقى هو دا صح ولا لأ
وكمان انا مش صغنونه قوى يعنى
دانا عندى واحد وعشرين سنه بحالهم.ز وحاسه انى خلاص كده وصلت لأعلى نقطه فى المنحنى بتاعى وهابتدى بقى أنزل وأقول ياللا حسن الختام

^ H@fSS@^ said...

طيب ما هو حضرتك انااديتك تلات اختيارات للاجابة و طلعت انا اكتر واحدة صح مش كده؟
هههههههه
المهم
كل اللي قصدي اقوله انها حلوة و ان شعور التردد و الضياع بان فيها اوي و انا فاهمة والله ان الشعر بالذات مش لازم يتحلل او نلاقيله قصةمعينة
تابع تحليلي في مقالتي الي نشرتها في العدد الاولاني هنا
:)
اذا كان ده هو بيت القصيد اذن يبقي انا حسيت صح
اذن يبقي انت دمت عبقري في الوصف
معلش يمكن نفس القصيدة اثرت فيا من ناحية انها زودت حاله التوهان
تحياتي

الخبز و الحرية said...

هو ده بالمللي.. تردد فظيييع واضطراب في التقييم والتقرير.. شفتوا بقى؟ شكة دبوس:)

albida said...

أنا طبعا فاهمة وجهة نظر حضرتك فى أنك ماتشرحليش
:)


هى المشكلة مش أنى مش حاسة القصيدة... لا... القصيدة دى احساس ماشى على رجلين
الاحساس قوى جدا لدرجة أنه طغى على المعنى وخلانى تهت فيه
بالظبط لما يكون واحد زعلان أوى وقاعد يقول كلام مش فاهمينه... ده مايمنعش أننا نحس به

أنا اللى حسيته أن فى واحد تايه بيتكلم... بيتردد... بيحب.. بيكره.. بيفرح.. بيحزن
وبراعة حضرتك تكمن أنك عرفت تنقلنا التشوش العقلى
mental chaos
ده بحذافيره... لدرجة ان احنا نفسنا أتشوشنا

ولو على المعانى المتربسة معايا دى.. أنا هابقى
أقعد مع حفصوصة قاعدة حلوة كده تفهمنى كل حاجة
:)

manal

الخبز و الحرية said...

ksawy@soficom.com.eg
شكرا يا صديقي

nour said...

القصيدة دى مينفعش تتفهم دى تتحس..المود بتاع اللى بيقراها لازم يكون متضبط على نفس موحة مودك..التناقضات اللى فيها بتوجع..الحب و الاكتئاب و الاحباط و الصور المفزعة..التردد و محاولة اقناع نفسك بحاجة و بعدين العدول عنها..الجو كله جاثومى بشكل غريب الخيط الفاصل ما بين الحلم و الواقع لما تكون حاسس ان انت صاحى بس مش قادر تفتح عنيك مش قادر تحرك اطرافك الهلوسة الجميلة..
انا معجبة اوى بالقصيدة دى و هنقلها دلوقت علشان احطها فى الكشكول بتاعى اللى بحط فيه كل الحاجات اللى بتأثر فيا..امل دنقل و اليوت و طاغور و نزار..
ملحوظة بقى:تعالى يا انتوك شوف الكتابات علشان بتقول على كتاباتى سوداورة و مكتئبة..انا نفسى اوصل للدرجة دى