Monday, October 16, 2006

مشتاق لعصفورة


مشتاق لعصفورة
قطة وجنية
تفرد جناحيّا
وتضمني ليّا
تسكن ف أحضاني
وتدوب وتفنيني
لكن بحنية

مشتاق لعصفورة
لما أطيّّرها
تكتب على دارها
اسمي ف خواطرها
وتطير ما تنساني
وتعود تلاقيني
وتردني فيّا

مشتاق لعصفورة
مهرة محنية
تعشق ضفايرها
وتحلهم ليّا
عاشقة على ديني
تشرب وتسقيني
والكون على هولُه
لما يشرّدني
هي تغرّدني
نهرب سوا مرة
نغزل سما بكرة
نظرة ف نور نظرة
ماشبع ملاغية

16 comments:

karakib said...

:)
و انا كمان علي فكره مشتاق لها
بس الاساطير بتقول انه نصك التاني مش سهل تلاقيه لانه في النصف التاني من الكره الارضيه ... و لا زلنا في رحله بحث مضنيه نعاني فيها من جفاف الاحساس
انتوك

^ H@fSS@^ said...

عصفورة و قطة و جنية خلطة سحرية
يا تري تجيب ايه في الاخر
رقة العصفورة
مكر القطة و شقاوة الجنية


تعشق ضفايرها
و تحلهم ليا
صور جميلة جميلة
شكرا
تحياتي

Anonymous said...

عاوزة أقولك انى طرت بجد زى العصفورة اللى بتحلم بيها وانا أقرأ ما كتبت
خصوصا إن حلم الطيران ده بيراودنى كتير ..الحريه أحلى و أهم إحساس فى الوجود
إنك تحب وتتحب بحريه
إنك تتطلع كل إللى جواك بحريه
ولو إنى نفسى أعمل كده فى حياتى ولكن بحس إن عندى إحساس يتملكنى كثيرا بالخوف يكبلنى كثيرا ونفسى أتخلص منه ...يمكن يكون ده تأثير المجتمع اللى حوالينا
خالد انت بتعرف تتطلع أحلى الأحاسيس من جوانا

Anonymous said...

خالد فكر إنك تلحن الكلام الجميل ده
هيكون أغنية رائعه
فكر يا خالد

الخبز و الحرية said...

يا سلام يا سي انتوك يا متمكن..قفلتها في وشنا واحنا اللي عايشين عالأمل:)
شكرا حفصة والله اهي كلها هلاوس بعيد عنك:)
شكرا امل..انا ملحنها فعلا من مقام ري الصغير

albida said...

ياه يا انتوك النصف الثانى من الكرة الأرضية!
عليه العوض و منه العوض!... كده احنا مش هنحب فى عيشتنا دى خالص
:)
كان فى فيلم اسمه
only you
بيتكلم على نفس الفكرة تقريبا... واحدة سافرت أخر الدنيا علشان تدور على نصها التانى و فى الاخر اكتشفت انه كان جنبها طول الوقت!

و الله موضوع الحب ده يجنن

manal

Anonymous said...

Gr8 touchable words Khaled :)

الخبز و الحرية said...

شكراللجميع
على فكرة فيه اسطورة اغريقية بتقول ان الراجل والست كانوا اصلا جسد واحد لكائن واحد ثم دب الخلاف او مش فاكر حصل ايه بالضبط اتقسموا نصين..ومن يومها وكل نص بيدور على التاني:) حلوة صح؟؟

Anonymous said...

لازم نلف وندور وندور على الحاجه المهمه فى حياتنا عشان نحس انها مهمه
لان اللى ما يتعبش فى حاجه صعب انه يحس بأهميتها
ياترى ألاقيك فين يا عصفورى؟؟
عاوزه أسمعها باللحن لو سمحت
اتصرف

schlau_oyoo said...

رائعة. النصف التاني ممكن يكون قريب جدا بس احنا اللي بندور علي الكمال و ده محال. و اكيد العصفورة و القطة و الحنية موجودة لما انت تقدر تحتويهاو تحب حنيتها , رقتها و كمان شراستها مش انت اللي عاوز القطة.......

Anonymous said...

النص التانى؟؟؟
اممممممم
معادلة صعبة
لكن الصدفة بتلعب اكبر دور فى العثور عليه


اطمن يا ابنى يا خالد

فيه امل

الخبز و الحرية said...

حتسمعيها قريب يا وينكي باذن الله.. بجهز حاجة عاوزها تكون مفاجأة:)
رجازة 11 متشكر جدا، على فمرة الاغنية اللي بتقولي عليها هي اصلا بتاعة الفنان العبقري والمناضل الملتزم نجد مارسيل خليفة.. يا ريت تدوري على حاجته.. بيغني قصائد لمحمود درويش.. تحفة بجد
ابيتاف شكرا للمعلومة.
سكلاو كلام زين زين زين.. طيب والله لاكون مفكر في الكلمتين دول.. شكرا.
شهروزة انت محسساني اني قاع في دار الفؤاد مستني بقية التحاليل:)

Anonymous said...

ههههههههههه
اة
لانهم حسسونى ان النص التانى دة منتظرينه يخرج من الانعاش
او من عملية استنساخ


عادى يعنى

schlau_oyoo said...

العفو.......علي فكرة لطيف جدا سكلاو.........هي كلمة الماني اسمها شلاو بمعني ماهر او ماكر بس سكلاو اجمل كتير. شكرا

الخبز و الحرية said...

عفوا شلاو :)

Anonymous said...

أنا أؤيد وأشجع وأدعم ياسمين فى الموضوع دا
احنا بقى طماعين جداااا
وعاوزين كل حاجه
فين الكحك والعيديه يا أبيه؟